സീരിയല്‍ നടന്‍ വിഷ്ണു പ്രസാദ് കരള്‍ രോഗം ബാധിച്ച് ഗുരുതരാവസ്ഥയില്‍; കൊച്ചിയിലെ ആശുപത്രിയില്‍ ചികിത്സയില്‍ കഴിയുന്ന നടന് ലിവര്‍ ട്രാന്‍സ്പ്ലാന്റിനായി ധനസഹായം തേടി സുഹൃത്തുക്കള്‍; സോഷ്യലിടത്തില്‍ ധനസഹായ പോസ്റ്റുകള്‍ ചര്‍ച്ചയാകുമ്പോള്‍

ഏറെ വര്‍ഷങ്ങളായി സിനിമകളിലും സീരിയലുകളിലും എല്ലാമായി തിളങ്ങി നില്‍ക്കുന്ന നടനാണ് വിഷ്ണു പ്രസാദ്. നായകനായും വില്ലനായും സഹ നടനായുമെല്ലാം അഭിനയിച്ചിട്ടുള്ള വിഷ്ണു പ്രസാദിന് ലഭിച്ച കഥപാത്രങ്ങളെല്ലാം മികച്ചതാക്കുവാനും സാധിച്ചിരുന്നു. ഇപ്പോഴിതാ, നടന്‍ കൊച്ചിയിലെ ആംസ്റ്റര്‍ മെഡിസിറ്റിയില്‍ ഗുരുതര രോഗം ബാധിച്ച് ചികിത്സയിലാണെന്ന വാര്‍ത്തകളാണ് എത്തിയിരിക്കുന്നത്. കരള്‍ രോഗമാണ് നടനെ ബാധിച്ചിരിക്കുന്നത്. എത്രയും പെട്ടെന്ന് നടന്റെ കരള്‍ മാറ്റിവയ്ക്കണമെന്നാണ് ഡോക്ടര്‍മാര്‍ നിര്‍ദ്ദേശിച്ചിരിക്കുന്നത്. എന്നാല്‍ ഇതിനു ചിലവ് വരുന്നത് ഭീമമായ തുകയാണ്. 30 ലക്ഷത്തോളം രൂപമാണ് കരള്‍ ട്രാന്‍സ്പ്ലാന്റേഷന് വേണ്ടത്. എന്നാല്‍ ഭാര്യയും രണ്ടു പെണ്‍മക്കളും അടങ്ങുന്ന അദ്ദേഹത്തിന്റെ പ്രിയപ്പെട്ടവര്‍ക്ക് എത്രയും പെട്ടെന്ന് സ്വരൂപിക്കാന്‍ സാധിക്കുന്നതിന് അപ്പുറമാണ് ഈ തുക. ഇതോടെയാണ് സിനിമാ സീരിയല്‍ സുഹൃത്തുക്കള്‍ വഴി പണം സ്വരൂപിച്ചു തുടങ്ങിയിരിക്കുന്നത്. അതിന്റെ വിവരങ്ങള്‍ പുറത്തു വന്നതോടെയാണ് നടന്റെ ആരോഗ്യസ്ഥിതിയെ കുറിച്ചുള്ള വാര്‍ത്തകളും പുറത്തുവന്നിരിക്കുന്നത്.

പ്രശസ്തമായ നിരവധി സീരിയലുകളിലൂടെ ശ്രദ്ധ നേടിയ വിഷ്ണുവിന്റെ ആരോഗ്യാവസ്ഥ ഞെട്ടലോടെയാണ് ആരാധരും ഏറ്റെടുക്കുന്നത്. നടന്റെ ഏറെ പ്രശസ്തമായ കഥാപാത്രങ്ങളാണ് പ്രേക്ഷക മനസുകളിലേക്ക് എത്തുന്നതും. രാക്കുയില്‍ സീരിയലിലെ കാരാളി ചന്ദ്രനും എന്റെ മാതാവിലെ ജോണ്‍സണും കനല്‍പ്പൂവിലെ ചെട്ടിയാരുമെല്ലാം തൊട്ടതെല്ലാം പൊന്നാക്കുന്ന നടന്റെ അഭിനയ മികവിന്റെ ഉദാഹരണങ്ങളാണ്. സുംബാ ഇന്‍സ്ട്രക്ടറും ഫിറ്റനെസ് ട്രെയിനും ഫാഷന്‍ ഡിസൈനറും ക്ലാസിക്കല്‍ ഡാന്‍സറുമൊക്കെയായ കവിതയാണ് വിഷ്ണുവിന്റെ ഭാര്യ. സ്വകാര്യ ജീവിതത്തിനപ്പുറം സ്വന്തം കരിയറിനും പ്രധാന്യം നല്‍കി മുന്നോട്ടു പോകുന്ന കവിതയ്ക്കും വിഷ്ണുവിനും രണ്ടു പെണ്‍മക്കളാണുള്ളത്. അഭിരാമിയും അനാമികയുമാണ് മക്കള്‍.

2022ലെ ഫെമിന മിസ് ഇന്ത്യ കേരള ടോപ്പ് 10ലും 2021ലെ മിസ് കേരളാ ടോപ്പ് 5ലും ഇടം നേടിയ മൂത്തമകള്‍ അഭിരാമി മോഡലിംഗ് രംഗത്താണ് ശ്രദ്ധ നല്‍കിയിരിക്കുന്നത്. ഒറ്റനോട്ടത്തില്‍ അമ്മയുടെ തനിപ്പകര്‍പ്പായ അഭിരാമി വിദേശത്തും നാട്ടിലുമായി നിരവധി പരസ്യ ചിത്രങ്ങളുടേയും പ്രൊജക്ടുകളുടേയും ഭാഗമായിട്ടുണ്ട്. ചേച്ചിയുടെ അതേ പാത പിന്തുടര്‍ന്ന് ഫാഷന്‍ മോഡലായി തിളങ്ങുന്ന പെണ്‍കുട്ടിയാണ് അനിയത്തി അനാമികയും. ഫാഷന്‍ റാംപുകളില്‍ തീപാറിക്കുന്ന നിരവധി ചിത്രങ്ങളും വീഡിയോകളും അനാമിക തന്റെ ഇന്‍സ്റ്റഗ്രാം പേജില്‍ പങ്കുവച്ചിട്ടുണ്ട്. ചേച്ചിയേക്കാള്‍ അനുജത്തി അനാമികയ്ക്കാണ് അമ്മയുമായി കൂടുതല്‍ മുഖസാദൃശ്യം ഉള്ളത്. അതേസമയം, രണ്ടു മക്കളുടേയും ചില്‍ ചില്‍ അച്ഛനാണ് വിഷ്ണു പ്രസാദ് എന്ന് പറയാതെ വയ്യ. കരിയറില്‍ തനിക്ക് ലഭിച്ച എല്ലാ വേഷങ്ങളും ഏറ്റവും മികച്ചതാക്കി തന്നെ പ്രസന്റ് ചെയ്തിട്ടുള്ള വിഷ്ണു പ്രസാദിന്റെ വര്‍ഷങ്ങള്‍ക്കു മുമ്പു വരെയുള്ള ഓരോ കഥാപാത്രങ്ങളും ഇന്നും പ്രേക്ഷകര്‍ ഓര്‍ത്തിരിക്കുന്നുണ്ട് എന്നതാണ് ഏറ്റവും വലിയ അംഗീകാരവും.

തന്റെ അഭിപ്രായങ്ങളും അഭിപ്രായ വ്യത്യാസങ്ങളുമെല്ലാം അതുപോലെ തുറന്നു പറയുന്ന താരം കൂടിയാണ് വിഷ്ണു പ്രസാദ്. രണ്ടു വര്‍ഷം മുമ്പ് സിനിമാ സീരിയലുകളില്‍ ഒരുമിച്ച് അഭിനയിച്ചപ്പോഴുണ്ടായ പ്രശ്‌നങ്ങളും സീരിയലിലെ നടന്മാര്‍ വെറും പോഴന്മാരാണ് എന്നതടക്കമുള്ള അഭിപ്രായങ്ങളും വിഷ്ണു പ്രസാദ് നടത്തിയിട്ടുണ്ട്. സീരിയലില്‍ സ്ത്രീകള്‍ക്ക് ആണ് പ്രധാനം. അഭിപ്രായ സ്വാതന്ത്രം ഇല്ലാത്ത, പ്രതികരണ ശേഷി ഇല്ലാത്ത പുരുഷന്മാരെയാണ് സീരിയലുകളില്‍ കാണിക്കുന്നത്. സീരിയലിനും, സീരിയല്‍ പ്രേക്ഷകര്‍ക്കും ആവശ്യം തന്റേടമുള്ള സ്ത്രീകളെയാണ്. സര്‍വ്വാഭരണ വിഭൂഷരായി സ്ത്രീകള്‍ സീരിയലുകളില്‍ നിറഞ്ഞു നില്‍ക്കും.

യഥാര്‍ത്ഥ ജീവിതത്തില്‍ പുരുഷന്മാര്‍ അങ്ങനെ ആവരുത് എന്ന പക്ഷക്കാരനാണ് വിഷ്ണു പ്രസാദ്. ഞാന്‍ പറഞ്ഞാല്‍ എന്റെ ഭാര്യ അനുസരിക്കണം. നല്ലതിനാണ് പറയുന്നത് എന്ന് മനസ്സിലാക്കണം. അനുസരണ കേട് കാണിച്ചാല്‍ ഭാര്യയെ തല്ലാം എന്നും വിഷ്ണു പറഞ്ഞു. അപ്പോള്‍ തിരിച്ച് ഭാര്യ ഭര്‍ത്താവിനെ നന്നാക്കാന്‍ ശ്രമിച്ചാലോ എന്ന് അവതാരക ചോദിച്ചപ്പോള്‍്, തിരിച്ച് തല്ലിയാല്‍ മേടിക്കണം എന്നായിരുന്നു നടന്റെ പ്രതികരണം