പെണ്ണുങ്ങള്‍ 'ആസ്വദിച്ച്' പ്രസവിക്കണോ? പ്രസവം 'സദ്യ' കഴിക്കുന്നത് പോലെയല്ല; നല്ല സദ്യ കഴിച്ച് പായസം കുടിച്ച് ഉറങ്ങുന്ന സുഖമാണ് പ്രസവമെന്നാണ് മാരാര്‍ ചിന്തിക്കുന്നത്; പീരിയഡസ് വേദന പോലും അങ്ങേര് സഹിക്കില്ല, തട്ട് ഇത്ര താഴുമെന്ന് കരുതിയില്ല'; അഖില്‍ മാരാരെ എയറിലേക്ക് വിട്ട് ലക്ഷ്മി മേനോന്‍ 

ബിഗ് ബോസ് സീസണ്‍ 5 ജേതാവും തൃക്കാക്കരയിലെ എന്‍ഡിഎ സ്ഥാനാര്‍ത്ഥിയുമായ അഖില്‍ മാരാര്‍ വീണ്ടും പ്രസവത്തെ കുറിച്ചു പരാമര്‍ശം നടത്തി വിവാദത്തില്‍ ചാടിയിരുന്നു. പ്രസവം സ്ത്രീകള്‍ ആസ്വദിച്ചു ചെയ്തിരുന്ന ഒന്നാണെന്നും ആശുപത്രികള്‍ വന്നതോടെയാണ് അത് സങ്കീര്‍ണ്ണമായതെന്നുമുള്ള മാരാരുടെ പ്രസ്താവനയ്‌ക്കെതിരെ സോഷ്യല്‍ മീഡിയയില്‍ പ്രതിഷേധം കത്തുകയാണ്. മാരാരുടെ ഈ വിചിത്ര വാദത്തെ പരിഹസിച്ച് നടി ലക്ഷ്മി മേനോന്‍ രംഗത്തെത്തിയതോടെ സംഗതി സോഷ്യല്‍ മീഡിയയില്‍ വലിയ ചര്‍ച്ചയായി മാറിയിരിക്കുന്നു. 

കഴിഞ്ഞ ദിവസം ഒരു പ്രസംഗത്തിനിടെയായിരുന്നു അഖില്‍ മാരാരുടെ വിവാദ പരാമര്‍ശം. പഴയകാലത്ത് സ്ത്രീകള്‍ പ്രസവത്തെ ഒരു ഭാരമായി കണ്ടിരുന്നില്ലെന്നും, അത് ആസ്വദിച്ചാണ് ചെയ്തിരുന്നതെന്നും മാരാര്‍ തട്ടിവിട്ടു. ആധുനിക വൈദ്യശാസ്ത്രവും ആശുപത്രികളും വന്നതോടെയാണ് പ്രസവം ഒരു രോഗമായി മാറിയതെന്ന രീതിയിലുള്ള മാരാരുടെ നിരീക്ഷണം 'അവിവേകം' ആണെന്നാണ് പൊതുവേ ഉയരുന്ന വിമര്‍ശനം. 

മാരാരുടെ തട്ട് ഇത്രയും താഴുമെന്ന് കരുതിയില്ലെന്നാണ് ലക്ഷ്മി മേനോന്‍ പരിഹാസരൂപേണ പറയുന്നത്. പ്രസവവേദന എന്താണെന്ന് അറിയാത്തവര്‍ അത് ആസ്വാദനമാണെന്ന് പറയുന്നത് കേള്‍ക്കുമ്പോള്‍ ചിരിക്കണോ കരയണോ എന്ന അവസ്ഥയിലാണെന്ന് ലക്ഷ്മി തന്റെ പ്രതികരണത്തില്‍ വ്യക്തമാക്കുന്നു. 'പീരിയഡ്സ് വേദന വന്നാല്‍ പോലും സഹിക്കാന്‍ പറ്റുമെന്ന് തോന്നുന്നില്ല പുള്ളിയ്ക്ക്. എന്നിട്ടാണ് പ്രസവത്തെക്കുറിച്ച് പറയുന്നത്. പഴയ കാലത്ത് ചായക്കടയിലും തൊഴുത്തിലുമൊക്കെ പ്രസവിച്ചിരുന്നു എന്ന് പറയുന്നത് ശരിയായിരിക്കാം, പക്ഷെ അന്ന് കുട്ടിയുണ്ടാകും, പലപ്പോഴും അമ്മ ഉണ്ടാകാറില്ല. ശിശുമരണ നിരക്കിനെക്കുറിച്ചും പ്രസവസമയത്തെ സ്ത്രീകളുടെ മരണത്തെക്കുറിച്ചും ഇദ്ദേഹത്തിന് അറിവില്ലേ?' - ലക്ഷ്മി ചോദിക്കുന്നു. 

പ്രസവം 'സദ്യ' കഴിക്കുന്നത് പോലെയല്ല. നല്ല സദ്യ കഴിച്ച് പായസം കുടിച്ച് ഉറങ്ങുന്ന സുഖമാണ് പ്രസവമെന്നാണ് മാരാര്‍ ചിന്തിക്കുന്നത്. ആധുനിക വൈദ്യശാസ്ത്രത്തിന്റെ പ്രാധാന്യം. ശിശുമരണ നിരക്ക് കുറഞ്ഞത് ആശുപത്രികളുടെയും സര്‍ക്കാരിന്റെയും ബോധവല്‍ക്കരണം മൂലമാണ്. താന്‍ സി-സെക്ഷന്‍ കഴിഞ്ഞ സമയത്ത് ഒരു ദിനോസറിനെപ്പോലെയാണ് നടന്നിരുന്നതെന്നും, അത്രമാത്രം കഠിനമാണ് പ്രസവാനന്തര വേദനയെന്നും ലക്ഷ്മി ഓര്‍മ്മിപ്പിക്കുന്നു. 

പ്രസംഗത്തിന്റെ അവസാനം അഖില്‍ മാരാര്‍ക്ക് രണ്ട് പെണ്‍മക്കളാണുള്ളതെന്ന കാര്യവും ലക്ഷ്മി ഓര്‍മ്മിപ്പിച്ചു. സ്വന്തം മക്കളുടെ ഭാവിയില്‍ ഇത്തരം പിന്തിരിപ്പന്‍ ചിന്താഗതികള്‍ എന്ത് സ്വാധീനമുണ്ടാക്കുമെന്ന സൂചനയും ലക്ഷ്മിയുടെ വാക്കുകളിലുണ്ട്. മാരാരുടെ പ്രസ്താവന സ്ത്രീവിരുദ്ധമാണെന്നും ശാസ്ത്രീയമായ അറിവില്ലായ്മയാണ് ഇതിലൂടെ വെളിവാകുന്നതെന്നും സോഷ്യല്‍ മീഡിയയില്‍ വലിയൊരു വിഭാഗം വാദിക്കുന്നു. അതേസമയം, രാഷ്ട്രീയ ലക്ഷ്യത്തോടെയാണ് മാരാര്‍ക്കെതിരെ ഇത്തരം സൈബര്‍ ആക്രമണങ്ങള്‍ നടക്കുന്നതെന്ന് അദ്ദേഹത്തിന്റെ ആരാധകര്‍ തിരിച്ചടിക്കുന്നു. ഏതായാലും മാരാരെ 'എയറില്‍' കയറ്റിയിരിക്കുകയാണ് സോഷ്യല്‍ മീഡിയയിലെ ട്രോളന്മാരും ലക്ഷ്മി മേനോനെപ്പോലുള്ള താരങ്ങളും.