ഡാന്‍സും അഭിനയവും ഒക്കെയായി യൂട്യൂബില്‍ താരം;മിഴിരണ്ടിലും സീരിയലിലെ കുഞ്ഞൂട്ടനായി എത്തി മിനിസ്‌ക്രീന്‍ പ്രേക്ഷകര്‍ക്കും പ്രിയങ്കരനായി; ഏറെ നാളത്തെ പ്രണയത്തിനൊടുവില്‍ കൂട്ടായെത്തിയത്സീരിയല്‍ നടി ശ്രീക്കുട്ടി; ബിഗ്ബോസില്‍ മത്സരിക്കാനെത്തിയ അഭിലാഷിന്റെ കഥ

മിഴിരണ്ടു സീരിയലിലെ കുഞ്ഞൂട്ടനായി എത്തി പ്രേക്ഷക ഹൃദയങ്ങള്‍ കീഴടക്കിയ കക്ഷിയാണ് അഭിലാഷ് എന്ന അഭി. ഏഷ്യാനെറ്റിലെ കാതോടു കാതോരത്തിലും അഭി അഭിനയിച്ചിട്ടുണ്ടെങ്കിലും മിഴിരണ്ടു സീരിയലിലെ കുഞ്ഞൂട്ടനായാണ് തിളങ്ങിയത്. സീരിയലിനൊപ്പം തന്നെ സോഷ്യല്‍ മീഡിയയിലും യൂട്യൂബിലും എല്ലാം സൂപ്പര്‍ താരവും. ഡാന്‍സും അഭിനയവും ഒക്കെയായി യൂട്യൂബില്‍ തിളങ്ങുന്ന അഭിയ്ക്കൊപ്പം എന്തിനും ഏതിനും കൂട്ടായി ഭാര്യ ശ്രീക്കുട്ടിയുമുണ്ട്. പത്തനംതിട്ടയില്‍ ജനിച്ച് തിരുവനന്തപുരത്ത് വളര്‍ന്ന അഭിയ്ക്ക് ഭാര്യയാണ് എല്ലാത്തിനും കരുത്തു നല്‍കുന്നതും. ഏഴു വര്‍ഷം മുമ്പ് വിവാഹിതരായ ശ്രീക്കുട്ടിയ്ക്കും അഭിലാഷിനും പ്രണയ ജീവിതത്തിന് കൂട്ടായി ഒരു മകളുമുണ്ട്. നൃത്തമാണ് അഭിലാഷിനേയും ശ്രീക്കുട്ടിയേയും ഒന്നിപ്പിച്ചത്. അഭിലാഷിന്റെ നൃത്തം കണ്ട് ശ്രീക്കുട്ടിയ്ക്ക് പ്രണയം തോന്നുകയായിരുന്നു.

ടിക് ടോക്കിലൂടെ സോഷ്യല്‍ മീഡിയയില്‍ ചുവടുവച്ച ആളാണ് അഭിലാഷ്. ഡി ഫോര്‍ ഡാന്‍സ് എന്ന റിയാലിറ്റി ഷോയിലൂടെ ശ്രദ്ധേയനായ അഭിലാഷിന് ജനിച്ചപ്പോഴേ കാലിന് പ്രശ്നം ഉണ്ടായിരുന്നു. ഇതിന്റെ പേരില്‍ സ്‌കൂള്‍ കാലഘട്ടത്തിലെല്ലാം ഒരുപാട് പരിഹാസങ്ങളും നേരിടേണ്ടി വന്നിട്ടുണ്ട്. ഒരിക്കല്‍ സ്‌കൂള്‍ യുവജനോത്സവത്തില്‍ പങ്കെടുക്കവെ കാല് വഴുതി അഭിലാഷ് വീണു. ഇത് കണ്ട് എല്ലാവരും ചിരിച്ചത് ആ കുഞ്ഞ് മനസിനെ വല്ലാതെ വേദനിപ്പിച്ചു. മറ്റുള്ളവര്‍ പരിഹസച്ചതിനെക്കാള്‍ 'പറ്റുന്ന പണിക്ക് പോയാല്‍ പോരെ', എന്ന ടീച്ചറുടെ വാക്കായിരുന്നു. പിന്നീടും ഒട്ടനവധി പരിഹാസങ്ങള്‍ നേരിടേണ്ടി വന്ന അഭിലാഷ് അവയെ കരുത്തായി ഏറ്റെടുത്തു. ജീവിതത്തില്‍ വന്ന ഓരോ പ്രതിസന്ധിയേയും തരണം ചെയ്ത് മുന്നേറുകയായിരുന്നു.

കാലിന് സ്വാധീനം ഇല്ലെങ്കിലും അതിനെ ഒരു കുറവായി കാണാതെ മികച്ച രീതിയില്‍ ഡി ഫോര്‍ ഡാന്‍സില്‍ മുന്നേറിയ അഭിലാഷ് ഏറെ കയ്യടികള്‍ നേടിയിരുന്നു. അഭിലാഷിന്റെ കുറവുകളൊന്നും തന്നെ നോക്കാതെ ഒപ്പം കൂടിയ ആളായിരുന്നു ശ്രീക്കുട്ടി. ശ്യാമാംബരം സീരിയലിലെ വിസ്മയ ആയും സൂര്യാ ടിവിയെ അമ്മക്കിളിക്കൂട് സീരിയലിലെ നീരജയായും എല്ലാം തിളങ്ങിയ ശ്രീക്കുട്ടി അഭിയുടെ ജീവിതത്തിലേക്ക് എത്തിയപ്പോഴാണ് ജീവിതം കൂടുതല്‍ കളര്‍ഫുളായത്. ഏറെ നാളത്തെ പ്രണയത്തിന് ഒടുവില്‍, വീട്ടിലെ എതിര്‍പ്പുകളെല്ലാം തരണം ചെയ്ത് ഇരുവരും ജീവിതത്തില്‍ ഒന്നിച്ചു. ഇതിന്റെ പേരില്‍ ട്രോളുകളും വിമര്‍ശനങ്ങളും വന്നു. എന്നിട്ടും അവയൊന്നും കാര്യമാക്കാതെ ശ്രീക്കുട്ടിയും അഭിലാഷും പൊരുതി. ഇന്ന് സോഷ്യല്‍ മീഡിയയിലെ പ്രിയതാര ദമ്പതികളായി അവര്‍ മാറി. വ്ലോഗറും ഇന്‍ഫ്ലുവന്‍സറും ഒക്കെയായ അഭിലാഷ് ഇന്ന് ഒരു അഭിനേതാവ് കൂടിയാണ്. രണ്ട് സീരിയലുകളില്‍ അഭിലാഷ് ഇതിനകം അഭിനയിച്ചും കഴിഞ്ഞു.

ഒരു ബിഗ് ബോസ് മത്സരാര്‍ത്ഥിക്ക് വേണ്ട ഗുണങ്ങളില്‍ ഒന്ന് പ്രതിസന്ധികളെ തരണം ചെയ്യുക എന്നതാണ്. കുട്ടിക്കാലം മുതല്‍ ഒട്ടനവധി പ്രതിസന്ധികളെ തരണം ചെയ്ത് മുന്നോട്ട് വന്ന അഭിലാഷിന് അതിന് സാധിക്കും എന്ന് നൂറ് ശതമാനം ഉറപ്പാണ്. പരിഹാസങ്ങളും തളര്‍ത്താനുള്ള വാക്കുകളും എവിടെ നിന്ന് വന്നാലും അഭിലാഷിന് പിടിച്ചു നില്‍ക്കാനാകും. ഒപ്പം പ്രേക്ഷക പിന്തുണയും ഉണ്ടാകുമെന്നാണ് കരുതപ്പെടുന്നത്. ഇന്നു മുതല്‍ മുന്നോട്ടുള്ള ഓരോ ദിവസവും അഭിലാഷിന്റെ ബിഗ് ബോസ് ജീവിതം എങ്ങനെയാകുമെന്ന് കാത്തിരുന്ന് കാണാം.