കള്ളിയങ്കാട്ട് നീലി – ഐതിഹ്യവും ക്ഷേത്രവും

കേരളത്തിന്റെ നാടോടിക്കഥകളും ഐതിഹ്യങ്ങളും തലമുറകളെ ആകര്‍ഷിച്ചുവരുന്നുണ്ട്. “ലോക ചാപ്റ്റര്‍ 1 – ചന്ദ്ര” എന്ന സിനിമയുടെ വിജയവും അതിന്റെ തെളിവാണ്. മലയാളികള്‍ക്ക് ഏറ്റവും പരിചിതവും പ്രിയങ്കരവുമായ കഥാപാത്രങ്ങളില്‍ ഒന്നാണ് കള്ളിയങ്കാട്ട് നീലി. തലമുറകളായി വാമൊഴിയായി കൈമാറിക്കൊണ്ടിരിക്കുന്ന ഈ കഥകളെ സിനിമയിലൂടെ വീണ്ടും അനുഭവിക്കാന്‍ കഴിഞ്ഞു.

എന്നാല്‍, കഥകളിലൊതുങ്ങാതെ കള്ളിയങ്കാട്ട് നീലി അമ്മന്‍ ക്ഷേത്രം യഥാര്‍ത്ഥത്തിലുമുണ്ട്. നാഗര്‍കോവിലിന് സമീപമുള്ള ചുങ്കന്‍കടയിലെ പാര്‍വതിപുരത്താണ് ഈ ചെറിയ ക്ഷേത്രം സ്ഥിതി ചെയ്യുന്നത്. ഇരുണ്ട കാടിനോട് ചേര്‍ന്നാണ് ക്ഷേത്രം. ചുറ്റുപാടുകളില്‍ കാണുന്ന കള്ളിമുള്ള് ചെടികളില്‍ നിന്നാണ് “കള്ളിയങ്കാട്” എന്ന പേര് ലഭിച്ചതെന്നാണ് കരുതുന്നത്.

ക്ഷേത്രത്തിന്റെ പ്രത്യേകതകള്‍

• ക്ഷേത്രം വളരെ ചെറുതാണെങ്കിലും ഐതിഹ്യങ്ങളുടെ ഭാരവും അന്തരീക്ഷത്തിന്റെ വൈവിധ്യവും നിറഞ്ഞതാണ്.

• ഇവിടെ ഭദ്രകാളിയുടെയും ഗണപതിയുടെയും പ്രതിഷ്ഠയുണ്ട്.

• ഓരോ വര്‍ഷവും മാര്‍ച്ച് – ഏപ്രില്‍ മാസങ്ങളിലാണ് വാര്‍ഷിക ഉത്സവം നടക്കുന്നത്. അന്ന് മാത്രമാണ് ഇവിടെ തിരക്കും ആഘോഷങ്ങളും നിറയുന്നത്.

ചരിത്രവും ഐതിഹ്യങ്ങളും

• ശ്രീ നാരായണ ഗുരു ഏകദേശം എട്ടുവര്‍ഷത്തോളം ധ്യാനിച്ച മരുത്വാമല, ഇവിടെ നിന്ന് ഏഴ് കിലോമീറ്റര്‍ അകലെയാണ്.

• പഴയ തിരുവിതാംകൂറിന്റെ കാലത്ത് “നഞ്ചിനാട്” എന്നറിയപ്പെട്ടിരുന്ന സ്ഥലമാണ് നാഗര്‍കോവില്‍. കൊന്നയാളിനും കൊല്ലപ്പെട്ടയാളിനും ഇവിടെ പ്രത്യേകം ക്ഷേത്രങ്ങളുള്ളത് പ്രത്യേകതയാണ്.

• മാര്‍ത്താണ്ഡവര്‍മ്മയും ഉമ്മിണിതങ്കയും തമ്മിലുള്ള കഥകള്‍ ഇവിടെ പറയപ്പെടുന്നു.

• അതുപോലെ തന്നെ, കടമറ്റത്ത് കത്തനാര്‍ ബന്ധിച്ചത് കള്ളിയങ്കാട്ട് നീലിയെയല്ല, പനയനര്‍ക്കാവ് നീലിയെയാണെന്നൊരു അഭിപ്രായവും നിലനില്‍ക്കുന്നു.

എങ്ങനെ എത്തിച്ചേരാം?

• തിരുവനന്തപുരം നിന്നും നാഗര്‍കോവിലിലേക്ക് ബസ് എടുക്കുക.

• അവിടെ നിന്ന് ചുങ്കന്‍കട ജംഗ്ഷനില്‍ ഇറങ്ങി കള്ളിയങ്കാട് റൂട്ടിലേക്കുള്ള ബസില്‍ കയറണം.

• കള്ളിയങ്കാട് ബസ് സ്റ്റോപ്പില്‍ ഇറങ്ങി വയലുകള്‍ക്കരികിലൂടെ പോകുന്ന വഴിയിലൂടെ പാര്‍വതിപുരത്തെ ക്ഷേത്രത്തിലെത്താം.

• തിരുവനന്തപുരം മുതല്‍ ഏകദേശം 60 കിലോമീറ്റര്‍ ദൂരമാണ്.