ബാലേട്ടനിലെ വില്ലന്റെ മകന്‍ ഇനി നായകന്‍; സിനിമാതാരം റിയാസ് ഖാന്റെ മകന്‍ വെളളിത്തിരയിലേക്ക്..!

സിനിമാ ലോകത്ത് ഇന്ന് മക്കള്‍ യുഗമാണ്. വര്‍ഷങ്ങള്‍ക്ക് മുന്‍പ് മുതല്‍ക്കെ തന്നെ എല്ലാ ഭാഷകളിലുമുള്ള സിനിമകളിലും അത് സംഭവിക്കുന്നുമുണ്ട്. ഈ നിരയില്‍ ഏറ്റവും ഒടുവിലായി അണിനിരക്കുന്നത് മലയാള- തമിഴ് സിനിമകളിലെ സ്ഥിരസാന്നിധ്യമായ റിയാസ് ഖാന്റെ മകനാണ്. റിയാസ് ഖാന്‍- ഉമ റിയാസ് ഖാന്‍ താരദമ്പതികളുടെ മകന്‍ ഷരീഖ് ഹസന്‍ ആണ് നായകനിരയിലേക്ക് ഏറ്റവുമൊടുവിലായി കടന്നു വരുന്നത്. 

രത്ന ലിംഗ സംവിധാനം ചെയ്യുന്ന ഉഗ്രം എന്ന ചിത്രത്തിലൂടെയാണ് ഷരീഖ് നായകനായി എത്തുന്നത്. അര്‍ച്ചന രവിയാണ് ചിത്രത്തിലെ നായിക. മുന്‍പ് മോഡലിങ്ങ് രംഗത്തെ സജീവ സാന്നിധ്യമായിരുന്ന ഷരീഖ് ബിഗ്‌ബോസ് തമിഴ് പതിപ്പിലൂടെയാണ് ശ്രദ്ധിക്കപ്പെടുന്നത്. 

വീട്ടുകാരുടെ സമ്മതമില്ലാതെ വിവാഹം ചെയ്ത് നാടുവിടുന്ന രണ്ട് പേരുടെ കഥയാണ് ചിത്രം പറയുന്നത്. നാടു വിട്ടുള്ള യുവതിയെ ഒരു അജ്ഞാതന്‍ തട്ടിക്കൊണ്ടു പോകുന്നതും തുടര്‍ന്നുണ്ടാകുന്ന സംഭവവികാസങ്ങളുമാണ് ചിത്രത്തിന്റെ പ്രമേയമെന്നാണ് സൂചന. ആക്ഷന്‍ ത്രില്ലര്‍ സ്വഭാവത്തിലുള്ള ചിത്രമായിരിക്കും ഉഗ്രം. 

വില്ലന്‍ കഥാപാത്രങ്ങളിലൂടെ സിനിമയില്‍ അരങ്ങേറ്റം കുറിച്ച റിയാസ് ഖാന്‍ നായകനായും പ്രതിനായകനായുമെല്ലാം ബിഗ്സ്‌ക്രിനില്‍ തിളങ്ങി. മലയാളം തമിഴ് കന്നഡ തെലുങ്ക് ഹിന്ദി ബംഗാളി തുടങ്ങിയ ഭാഷകളിലെ സിനിമകളില്‍ ശ്രദ്ധേയവേഷം അവതരിപ്പിക്കാന്‍ റിയാസ് ഖാനു സാധിച്ചിട്ടുണ്ട്.   ബാലചന്ദ്രമേനോന്‍ സംവിധാനം ചെയ്ത 'സുഖം സുഖകരം' എന്ന ചിത്രത്തിലൂടെയാണ് സിനിമ രംഗത്തേക്ക് പ്രവേശിക്കുന്നത്. പിന്നീട് മോഹന്‍ലാല്‍ നായകനായ 'ബാലേട്ടന്‍' എന്ന ചിത്രത്തില്‍ പ്രതിനായക വേഷം അവതരിപ്പിച്ചിട്ടുണ്ട്. ആമിര്‍ ഖാന്‍ നായകനായ ഗജനി എന്ന ഹിന്ദി ചിത്രത്തിലും റിയാസ് ഖാന്‍ അഭിനയിക്കുകയുണ്ടായി. വില്ലന്‍ കഥാപാത്രത്തിലൂടെയാണ് റിയാസ് ഖാന്‍ പ്രേക്ഷകര്‍ക്ക് സുപരിചിതനായത്. സിനിമകളില്‍ കൂടാതെ മിനിസക്രീനിലും റിയാസ് ഖാന്‍ തന്റെ സാന്നിധ്യം അറിയിച്ചിട്ടുണ്ട്. നിലവില്‍ നന്ദിനി എന്ന സീരിയലില്‍ കേന്ദ്രകഥാപാത്രങ്ങളിലൊരാളായ കറുപ്പുസ്വാമി എന്ന കഥാപാത്രത്തെയാണ് റിയാസ് ഖാന്‍ അവതരിപ്പിക്കുന്നത്. .യുവതാരനിരയിലേക്ക് പുതിയൊരാള്‍ കൂടിയെത്തുന്നതിന്റെ ആവേശത്തലാണ് ഇപ്പോള്‍ സിനിമാ ആരാധകര്‍.