ഡ്രസിംങ് റൂമില്‍ പോയപ്പോള്‍ പിന്നാലെ വന്ന് പുറകില്‍ നിന്ന് കടന്നു പിടിച്ചു; 10 മിനിട്ട് മനസുവച്ചാല്‍ മഞ്ജു വാര്യരുടെ മകളായി അഭിനയിപ്പിക്കാം എന്നുപറഞ്ഞു; ഓഡിഷന് പോയപ്പോള്‍ ഉണ്ടായ ദുരനുഭവം വെളിപ്പെടുത്തി  മാളവിക ശ്രീനാഥ്

സിനിമ ഓഡിഷനെത്തിയ പ്പോഴുണ്ടായ കാസ്റ്റിംഗ് കൗച്ച് അനുഭവം വെളിപ്പെടുത്തി യുവ നടി മാളവിക ശ്രീനാഥ്. ഒരു സിനിമയുടെ ഓഡിഷന് എത്തിയപ്പോഴുണ്ടായ അനുഭവത്തെ കുറിച്ചാണ് താരം പറയുന്നത്. ഡ്രെസിംഗ് റൂമില്‍ കയറിയപ്പോള്‍ സിനിമയുമായി ബന്ധപ്പെട്ടയാള്‍ കയറിപ്പിടിച്ചെന്ന് മാളവിക പറഞ്ഞു. ട്വന്റി ഫോര്‍ ന്യൂസിന് അനുവദിച്ച അഭിമുഖത്തിലാണ് താരം ഇതേ കുറിച്ച് തുറന്നുപറയുന്നത്.

കാസ്റ്റിംഗ് കൗച്ച് ഉണ്ട്. ഞാനതിന്റെ ഇരയാണെന്ന് വേണമെങ്കില്‍ പറയാം. ഞാന്‍ ഇതിനെ കുറിച്ച് വേറെ എവിടെയും തുറന്ന് സംസാരിച്ചിട്ടില്ല. ഇപ്പോള്‍ എനിക്ക് ഇന്‍ഡസ്ട്രിയില്‍ ഒരു സ്പേസ് ഉണ്ട്, ഒരു റോള്‍ ഉണ്ട്. അതുകൊണ്ട് എനിക്ക് ധൈര്യമായിട്ട് പറയാലോ. ആരാ, എന്താ എന്നുള്ളതല്ല, കുറേക്കാലം മുന്നേ, മൂന്ന് കൊല്ലം മുമ്പ് എന്നെ വിളിച്ചു.എനിക്കറിയാമായിരുന്നു ആ സിനിമയുമായി റിലേറ്റഡ് ആയിട്ടുള്ള ആരുമല്ല ഇവര്, വേറെ ഏതോ ടീമാണ് അങ്ങനെ ചെയ്തതെന്ന് എനിക്കറിയാം.

മഞ്ജു വാര്യരുടെ ഒരു മൂവിക്ക് വേണ്ടിയാണ്. മഞ്ജുവിന്റെ മോളായിട്ട് അഭിനയിക്കാനാണെന്ന് എന്നോട് പറഞ്ഞു. എനിക്ക് സിനിമയില്‍ കോണ്ടാക്ട് ഉണ്ടായിരുന്നില്ല. ജെനുവിന്‍ ആണോന്ന് അറിയില്ല,? എങ്കിലും ഓഡിഷന് വരാമെന്ന് സമ്മതിച്ചു. ഇവര്‍ വീട്ടിലേക്ക് ഇന്നോവ കാര്‍ വിട്ടു. ഞാനും അമ്മയും അനിയത്തിയും കൂടെയാണ് പോയത്. തൃശൂര്‍ ഭാഗത്ത് എവിടെയോ ആയിരുന്നു ഓഡിഷന്‍. അര മണിക്കൂര്‍ ഓഡിഷന്‍ കഴിഞ്ഞപ്പോള്‍, എന്റെ മുടി പാറിയിട്ടുണ്ട്,? അത് ഡ്രസിംഗ് റൂമില്‍ പോയി ശരിയാക്കിയിട്ട് വരൂ എന്നു പറഞ്ഞു. ഞാന്‍ ഡ്രസിംഗ് റൂമില്‍ പോയ ഉടന്‍ ഇയാള്‍ പിന്നാലെ വന്ന് എന്നെ പിറകില്‍ നിന്ന് കടന്നുപിടിക്കുകയായിരുന്നു. 

എത്ര തട്ടി മാറ്റിയിട്ടും അയാള്‍ പോകുന്നുണ്ടായിരുന്നില്ല. ഇപ്പോ ഒന്നു മനസു വച്ചാല്‍ മഞ്ജു വാര്യരുടെ മകളായി ആയിരിക്കും സ്‌ക്രീനില്‍ മാളവികയെ കാണുക എന്നു പറഞ്ഞു. അമ്മയും അനിയത്തിയും പുറത്തിരുന്നോട്ടെ,? പത്ത് മിനിട്ട് ഇവിടെ നിന്നാല്‍ മതിയെന്ന് പറഞ്ഞു. കരയാന്‍ തുടങ്ങിയ ഞാന്‍ അയാളുടെ കാമറ തട്ടിതാഴെയിടാന്‍ നോക്കി. അയാളുടെ ശ്രദ്ധ മാറിയ സമയത്ത് ഞാന്‍ അവിടെ നിന്ന് പുറത്തേക്കിറങ്ങി രക്ഷപ്പെടുകയായിരുന്നു എന്ന് മാളവിക വെളിപ്പെടുത്തുന്നു,

അയാളുടെ കയ്യിലെ ക്യാമറ തട്ടിക്കളഞ്ഞ് ഞാന്‍ ഒന്നും നോക്കാതെ ഈ ഗ്ലാസ് വിന്‍ഡോ തുറന്ന് പുറത്തേക്ക് ഞാന്‍ കരഞ്ഞോടിയിട്ടുണ്ട്. മുന്നില്‍ വന്ന ബസിലോട്ട് ഓടി കേറി. എന്റെ അമ്മയും അനിയത്തിയും ഓടി വന്ന് ബസ് കൈകാട്ടി നിര്‍ത്തി അവരും കയറി. എങ്ങോട്ട് പോകുന്ന ബസ് ആണെന്ന് പോലും അറിയില്ലായിരുന്നു. ബസില്‍ ഇരുന്ന് ഞാന്‍ അലറിക്കരഞ്ഞിട്ടുണ്ട്. ഇതുപോലത്തെ രണ്ടും മൂന്നും അനുഭവങ്ങള്‍ ഉണ്ടായിട്ടുണ്ട്.