മമ്മുക്കയുടെ പ്രകടനത്തില്‍ അമ്പരന്നു; അദ്ദേഹത്തിന്റെ സ്‌ക്രിപ്റ്റ് സെലക്ഷന്‍ ഇപ്പോഴും അത്ഭുതപ്പെടുന്നു;ഭ്രമയുഗം എടുക്കാന്‍ തീരുമാനിച്ച നിങ്ങളുടെ ധീരമായ ശ്രമത്തിന് രാഹുല്‍ സദാശിവനും ടീമിനും അഭിനന്ദനങ്ങള്‍; കുറുപ്പുമായി  ജൂഡ്  ആന്തണി ജോസഫ്

ഭ്രമയുഗത്തിനെ പ്രശംസിച്ച് സംവിധായകന്‍ ജൂഡ് ആന്തണി ജോസഫും. ഈ ചിത്രം എടുക്കാന്‍ തീരുമാനിച്ച ധീരമായ ശ്രമത്തിന് അണിയറപ്രവര്‍ത്തകര്‍ക്ക് അഭിനന്ദനങ്ങള്‍ അറിയിക്കുകയും മമ്മൂട്ടിയുടെ അഭിനയമികവിനെ പുകഴ്ത്തുകയും ചെയ്തുകൊണ്ടാണ് ജൂഡ് ഇക്കാര്യം കുറിച്ചത്. 

ഭ്രമയുഗം എന്ന ചിത്രം എടുക്കാന്‍ തീരുമാനിച്ച ധീരമായ ശ്രമത്തിന് രാഹുല്‍ സദാശിവനും ടീമിനും അഭിനന്ദനങ്ങള്‍. അര്‍ജുന്റെയും സിദ്ധാര്‍ത്ഥിന്റെയും പ്രകടനം ഞെട്ടിച്ചു. പക്ഷേ, മമ്മുക്കയുടെ പ്രകടനത്തില്‍ ഞാന്‍ അമ്പരന്നു, എന്തൊരു നടനാണ്, അദ്ദേഹത്തിന്റെ സ്‌ക്രിപ്റ്റ് സെലക്ഷനില്‍ ഇപ്പോഴും അത്ഭുതപ്പെടുന്നു. ഞങ്ങളെ പ്രചോദിപ്പിക്കുന്നതിന് നന്ദി മമ്മുക്ക', ജൂഡ് കുറിച്ചു.

രാഹുല്‍ സദാശിവന്‍ സംവിധാനം ചെയ്ത ഹൊറര്‍ ത്രില്ലര്‍ ചിത്രമാണ് ഭ്രമയുഗം. ചിത്രത്തില്‍ പ്രതിനായക വേഷമാണ് മമ്മൂട്ടിക്ക്. അര്‍ജുന്‍ അശോകനാണ് ചിത്രത്തില്‍ നായക വേഷം കൈകാര്യം ചെയ്യുന്നത്. മലയാളം, തമിഴ്, കന്നഡ, തെലുങ്ക്, ഹിന്ദി തുടങ്ങി അഞ്ച് ഭാഷകളിലാണ് സിനിമ റിലീസ് ചെയ്തത്. ബ്ലാക്ക് ആന്‍ഡ് വൈറ്റില്‍ ആണ് ചിത്രം കഥപറയുന്നത്. സിദ്ധാര്‍ത്ഥ് ഭരതന്‍, അമല്‍ഡ ലിസ് തുടങ്ങിയവരാണ് മറ്റ് പ്രധാന വേഷങ്ങള്‍ കൈകാര്യം ചെയ്യുന്നത്.

സിനിമ ഇതുവരെ 12.80 കോടി രൂപയാണ് രാജ്യത്ത് നിന്ന് വാരികൂട്ടിയത്. ഇന്നലെ മാത്രം സിനിമയ്ക്ക് 67.62 ശതമാനം ഒക്യുപെന്‍സിയാണ് ലഭിച്ചത്. മോണിംഗ് ഷോകള്‍ - 56.75%, ആഫ്റ്റര്‍ നൂണ്‍ ഷോ -71.86%, ഈവനിംഗ് ഷോ -71.86% നൈറ്റ് ഷോ- 63.20% എന്നിങ്ങനെയായിരുന്നു സിനിമയുടെ ഒക്യുപെന്‍സി. 3.90 - 4 കോടിയ്ക്കിടയില്‍ സിനിമ നേടിയെന്നാണ് റിപ്പോര്‍ട്ട്. ഇതോടെ ആഗോള കളക്ഷന്‍ 30 കോടിയ്ക്ക് മുകളില്‍ എത്തുമെന്നാണ് അനലിസ്റ്റുകളുടെ നിഗമനം.