നിങ്ങള്‍ ഈ പറയുന്ന മോശം വെള്ളത്തില്‍ ഞാനും ഏട്ടനും കുളിച്ചു; മഹാകുംഭമേളയില്‍ പുണ്യസ്നാനം ചെയ്തിട്ട് ഞങ്ങള്‍ക്കാര്‍ക്കും ചൊറിച്ചില്‍ ഇല്ല; നെഗറ്റീവ് കമന്റ്സ് ഇടുന്നവര്‍ ഇങ്ങോട്ട് കേറി ചൊറിയണ്ട; ചൊറി വരുവാണെങ്കില്‍ ഞങ്ങള്‍ അങ്ങ് സഹിച്ചു: മറുപടിയുമായി സിനിമാ-സീരിയല്‍ താരം ശ്രീക്കുട്ടി 

മഹാകുംഭമേളയില്‍ പങ്കെടുത്ത ശേഷം സിനിമാ-സീരിയല്‍ താരം ശ്രീക്കുട്ടി ത്രിവേണി സംഗമത്തില്‍ സ്നാനം ചെയ്യുന്നതിന്റെ ചിത്രങ്ങള്‍ ഇന്‍സ്റ്റഗ്രാമില്‍ പങ്കുവച്ചിരുന്നു. ഇതിനുപിന്നാലെ നെഗറ്റീവ് കമന്റ്സ് ഇട്ടവര്‍ക്ക് മറുപടിയുമായി എത്തിയിരിക്കുകയാണ് നടി. ഇപ്പോള്‍ അഭിനയരംഗത്ത് സജീവമല്ലെങ്കിലും സോഷ്യല്‍ മീഡിയയിലെ നിരന്തര സാന്നിധ്യമാണ് ശ്രീക്കുട്ടി. ഭര്‍ത്താവ് മനോജ് കുമാറിനൊപ്പമാണ് മഹാകുംഭമേളയില്‍ പങ്കെടുക്കാന്‍ ശ്രീക്കുട്ടി പ്രയാഗ്രാജില്‍ പോയത്. മഹാകുംഭമേളില്‍ സ്നാനം ചെയ്തതിന്റെ പേരില്‍ തനിക്കെ ഭര്ത്താവിനോ ഇതുവരെ ആരോഗ്യപ്രശ്നമൊന്നും ഇല്ലെന്നും അവര്‍ വീഡിയോയില്‍ പറഞ്ഞു. 

കുംഭമേളയില്‍ പോയി വന്നിട്ട് രണ്ടാഴ്ചയില്‍ കൂടുതല്‍ ആയി, ഇതുവരെ തനിക്കൊരു ജലദോഷമോ, ചുമയോ, പനിയോ, ദേഹം ചൊറിച്ചിലോ ഒന്നും ഉണ്ടായിട്ടില്ലെന്നും മോശം കമന്റ് ഇടുന്നവര്‍ക്കാണ് യഥാര്‍ഥത്തില്‍ ചൊറിച്ചിലെന്നും താരം പറയുന്നു. 'ഈ തിരക്കിനിടയിലും ഇങ്ങനൊരു വീഡിയോ ചെയ്യാനുള്ള കാരണമുണ്ട്. മഹാ കുംഭമേളയുടെ ഭാഗമാകാന്‍ എനിക്കും എന്റെ ഭര്‍ത്താവിനും കഴിഞ്ഞിരുന്നു. പോകാന്‍ പറ്റാത്തവരൊക്കെ ഞങ്ങള്‍ക്കൊപ്പം ആ യാത്രയില്‍ കൂടിയിട്ടുണ്ടായിരുന്നു. എന്നാല്‍ നൂറില്‍ അറുപത് ശതമാനം പേരും ഇതിനു എതിരായിരുന്നു. ഒരുപാട് മെസേജുകള്‍ വരുന്നുണ്ട്. കൂടുതലും നെഗറ്റീവാണ്. ഇപ്പോഴും പലരും മെസേജുകള്‍ അയയ്ക്കുന്നുണ്ട്, അതുകൊണ്ട് എനിക്കിതിവിടെ പറയണമെന്നു തോന്നി. കമന്റ് ചെയ്തവര്‍ ഈ വീഡിയോ കാണുന്നുണ്ടോ എന്നൊന്നും എനിക്കറിയില്ല. എന്നാലും കാണുന്നവര്‍ കുറച്ചു പേരെങ്കിലും ഉണ്ടാകും. 

ഞങ്ങള്‍ കുംഭമേളയില്‍ പോയി വന്നിട്ട് രണ്ടാഴ്ചയില്‍ കൂടുതല്‍ ആയി. ഞങ്ങള്‍ക്ക് ഇന്നുവരെ ഒരു ജലദോഷമോ, ചുമയോ, പനിയോ, ദേഹം ചൊറിച്ചിലോ ഒന്നും ഉണ്ടായിട്ടില്ല. ഈ കമന്റ്സ് ഇടുന്നവര്‍ ചൊറിയുന്നതല്ലാതെ ഞങ്ങള്‍ക്കൊരു ചൊറിച്ചിലോ കാര്യങ്ങളോ ഉണ്ടായിട്ടില്ല. ഞങ്ങളവിടെ ത്രിവേണി സംഗമത്തിലാണ് സ്നാനം ചെയ്തത്. അവിടെ സ്നാനം ചെയ്ത ദിവസം കുളിക്കാന്‍ പറ്റിയിരുന്നില്ല. കാരണം റൂം എടുത്തില്ലായിരുന്നു. രണ്ട് ദിവസം ഞങ്ങള്‍ സോപ്പ് ഉപയോഗിച്ച് കുളിച്ചിട്ടില്ല. വെറുതെ ഒന്ന് മുങ്ങിക്കുളിച്ചതേയുള്ളൂ. അതില്‍ കുളിച്ചിട്ട് ഇന്ന് വരെ ഞങ്ങള്‍ക്കൊരു കുഴപ്പവും പറ്റിയിട്ടില്ല എന്നതാണ് സത്യം. മുടിക്കോ ദേഹത്തിനോ മണമോ, ചൊറിച്ചിലോ അങ്ങനെ ഒന്നും ഉണ്ടായിട്ടില്ല. പിന്നീട് വീട്ടില്‍ വന്ന ശേഷമാണ് മുടി വരെ കഴുകിയത്. എനിക്കു ഒരു പാര്‍ട്ടിയുമില്ല, ഞാന്‍ ദൈവ വിശ്വാസിയാണ്' ശ്രീക്കുട്ടി പറഞ്ഞു. 

നിങ്ങള്‍ ഈ പറയുന്ന മോശം വെള്ളത്തില്‍ ഞാനും ഏട്ടനും കുളിച്ചു. 63 കോടി ആളുകള്‍ വന്നു എന്നാണ് പറയുന്നത്. അവരുടെ ആരുടേയും കാര്യം എനിക്ക് അറിയില്ല. അതില്‍ രണ്ടുവ്യക്തികളായ ഞാനും ഏട്ടനും കുളിച്ചിട്ട് ഈ നിമിഷംവരെ ഒരുബുദ്ധിമുട്ടും ഉണ്ടായിട്ടില്ല എന്നതാണ് സത്യം. വീട്ടില്‍ വന്നശേഷമാണ് തല കഴുകിയത്. ആ നിമിഷംവരെ മുടിക്കോ ദേഹത്തിനോ ഒരു മണം പോലും ഉണ്ടായിരുന്നില്ല. പുറത്തുപറയാന്‍ പറ്റാത്ത രീതിയില്‍വരെയുള്ള സന്ദേശങ്ങള്‍ വ്യക്തിപരമായിപ്പോലും ലഭിക്കുന്നുണ്ട്. അതില്‍ കൂടുതല്‍പ്പേരും അഹിന്ദുക്കളാണ്. പിന്നെ പാര്‍ട്ടിപരമായിട്ടാണ് കൂടുതല്‍. വിശ്വാസമില്ലാത്ത ഹിന്ദുക്കളുമുണ്ട്', ശ്രീക്കുട്ടി വിമര്‍ശിച്ചു. 

ശാസ്ത്രീയമായി വിശ്വസിക്കേണ്ട കാര്യങ്ങള്‍ നേരത്ത പങ്കുവെച്ച വീഡിയോയില്‍ പറഞ്ഞിരുന്നു. ജൂപ്പിറ്ററിന് ചുറ്റും സണ്ണും മൂണും ചുറ്റിയിട്ട് എക്‌സ്ട്രാ പവര്‍ വരും. ആ പവര്‍ വെള്ളത്തില്‍ ചെന്ന് പതിക്കും. അപ്പോള്‍ ആ വെള്ളത്തിന് ഒരു പവര്‍ ലഭിക്കുമെന്നാണ് പറയുന്നത്. അങ്ങനെ വേണമെങ്കിലും വിശ്വസിക്കാം. എന്തിനാണ് ഈ രീതിയില്‍ അധിക്ഷേപിക്കുന്നത് എന്ന് മനസിലാകുന്നില്ല. എനിക്ക് ചൊറി വന്നാല്‍ ഞാനങ്ങ് സഹിച്ചു. നിങ്ങളെന്തിനാണ് അതിനെപ്പറ്റി ഓര്‍ത്ത് വിഷമിക്കുന്നത്? ഇങ്ങനെയൊക്കെ പറയാന്‍ മനുഷ്യര്‍ അധഃപതിച്ചുപോയോ?', അവര്‍ വീഡിയോയില്‍ ചോദിക്കുന്നു. 144 വര്‍ഷത്തിലൊരിക്കല്‍ മാത്രമാണ് കുംഭമേള നടക്കുന്നത്. ഇനി അടുത്ത 144 വര്‍ഷത്തില്‍ മാത്രമേ ഈ കാര്യം സംഭവിക്കുകയുള്ളൂ. നമ്മുടെ തലമുറയ്ക്ക് ലഭിച്ച ഭാഗ്യമാണ്. ഹിന്ദുക്കള്‍ക്ക് ആ രീതിയില്‍ വിശ്വസിക്കാം. അല്ലാത്തവര്‍ക്ക് ഞാന്‍ പറഞ്ഞ രീതിയില്‍ ശാസ്ത്രീയമായി വിശ്വസിക്കാം. ആ വിശ്വാസത്തെ വൃത്തികെട്ട രീതിയില്‍ മാറ്റേണ്ട ആവശ്യമില്ല. 

കുംഭമേളയ്ക്ക് പോയ അനുഭവം പങ്കുവെക്കുമ്പോള്‍ അതിന് താഴെ മോശം കമന്റിടാന്‍ നാണമുണ്ടോ? സീരിയസായി ചോദിക്കുകയാണ്, നിങ്ങള്‍ക്ക് അല്പമെങ്കിലും, ലവലേശം നാണമുണ്ടോ? ഉളുപ്പുണ്ടോ? നമുക്ക് ആര്‍ക്കും പോകാന്‍ പറ്റിയില്ലല്ലോ, ഇനി പറ്റില്ലല്ലോ, പോയില്ലല്ലോ എന്ന ചൊറിയാണോ എന്ന് അറിയില്ല. എന്തായാലും ഞങ്ങള്‍ക്ക് അത് അനുഭവിച്ചറിയാന്‍ പറ്റി. അതിന് താഴെ വന്ന് ഇനി അങ്ങനെ വെറുതേ ചൊറിയേണ്ട ആവശ്യമില്ല. ആ വെള്ളം കൊണ്ടുവന്ന് എന്റെ വീട്ടിലും വേദയ്ക്കും അടുത്ത വീട്ടിലും എല്ലായിടത്തും കൊടുത്തിട്ടുണ്ട്. അവരെല്ലാവരും തലയ്‌ക്കൊഴിച്ചിട്ടുമുണ്ട്. അവര്‍ക്കാര്‍ക്കും ചൊറി വന്നിട്ടില്ല. അതുകൊണ്ട് ഇങ്ങോട്ട് കേറി ചൊറിയണ്ട, ഞങ്ങള്‍ക്ക് ചൊറിവരുവാണെങ്കില്‍ ഞങ്ങള്‍ അങ്ങ് സഹിച്ചു', ശ്രീകുട്ടി വ്യക്തമാക്കി.