രാമായണം ആസ്പദമാക്കിയുള്ള ചിത്രം വസ്തുതകള്‍ വളച്ചൊടിച്ചു; രാമനെയും രാവണനെയും ചിത്രീകരിച്ചത് തെറ്റായും;ആദിപുരുഷ് നിരോധിക്കണം എന്നാവശ്യവുമായി ബി ജെ പി എം എല്‍ എയും അയോദ്ധ്യാ ക്ഷേത്രം പൂജാരിയും

പ്രഭാസ് ചിത്രം ആദിപുരുഷിന്റെ ടീസര്‍ പുറത്തിറങ്ങിയതുമുതല്‍ വിവാദങ്ങള്‍ വിടാതെ പിന്തുടരുകയാണ്. ടീസറിന് പിന്നാലെയിറങ്ങിയ ട്രോളുകള്‍ക്ക് ശേഷം ഇപ്പോഴിതാ ചിത്രം നിരോധിക്കണമെന്ന ആവശ്യവുമായി രംഗത്തെത്തിയി രിക്കുകയാണ് ബി ജെ പി എം എല്‍ എയും അയോദ്ധ്യാ ക്ഷേത്രം പൂജാരിയും.രാമായണം ആസ്പദമാക്കിയുള്ള ചിത്രം വസ്തുതകള്‍ വളച്ചൊടിച്ചു എന്നാരോപിച്ചാണ് ചിത്രം നിരോധിക്കണമെന്ന് ബി ജെ പി വക്താവ് ആവശ്യപ്പെടുന്നത്. 

നേരത്തെ മദ്ധ്യപ്രദേശ് ആഭ്യന്തരമന്ത്രി നരോട്ടം മിശ്രയും ആദിപുരുഷിനെതിരെ രംഗത്തെത്തുകയും ചിത്രത്തിലെ ചില ഭാഗങ്ങള്‍ ഒഴിവാക്കണമെന്ന് ആവശ്യപ്പെടുകയും ചെയ്തിരുന്നു.ആദിപുരുഷ് നിരോധിക്കുന്നതിനൊപ്പം ചിത്രത്തിന്റെ നിര്‍മാതാക്കളെ കുറച്ച് നാളത്തേയ്ക്ക് സിനിമാ മേഖലയില്‍ നിന്ന് പുറത്താക്കണമെന്നും രാം കദം പറയുന്നു. ആദിപുരുഷിന്റെ പ്രദര്‍ശനം അനുവദിക്കില്ല. ചിത്രം ഹിന്ദു ദൈവങ്ങളെ വികലമാക്കി.പണത്തിനും പ്രശസ്തിക്കുമായി ചില നിര്‍മാതാക്കള്‍ വസ്തുതകളെ വളച്ചൊടിക്കുന്നു. ഹിന്ദു സമൂഹം ഇത് സഹിക്കില്ലെന്നും ഇന്ന് രാവിലെ മാദ്ധ്യമങ്ങളെ അഭിസംബോധന ചെയ്യുന്നതിനിടെ രാം കദം വ്യക്തമാക്കി.

സിനിമക്കെതിരെ അയോധ്യ രാമക്ഷേത്രത്തിന്റെ മുഖ്യ പുരോഹിതനും രംഗത്തെത്തി. ആദിപുരുഷ് സിനിമ നിരോധിക്കണമെന്നും സിനിമയിലെ രാമ,രാവണ, ഹനുമാന്‍ കഥാപാത്രങ്ങള്‍ ദൈവ സങ്കല്‍പ്പങ്ങള്‍ക്ക് അവമതിപ്പുണ്ടാക്കുന്നതായും മുഖ്യ പുരോഹിതന്‍ സത്യേന്ദ്ര ദാസ് പറഞ്ഞു. സിനിമ നിര്‍മ്മിക്കുന്നത് കുറ്റകരമല്ല. എന്നാല്‍ ബോധപൂര്‍വമായ വിവാദങ്ങള്‍ സൃഷ്ടിച്ച് ജനശ്രദ്ധ പിടിച്ചുപറ്റാന്‍ സിനിമയെടുക്കരുതെന്നും അദ്ദേഹം കൂട്ടിച്ചേര്‍ത്തു.  

യു.പി ഉപ മുഖ്യമന്ത്രിമാരായ കേശവ് പ്രസാദ് മൗര്യയും ബ്രജേഷ് പതക്കും സിനിമയുടെ ടീസറിനെതിരെ നേരത്തെ രംഗത്തുവന്നിരുന്നു. ഹിന്ദു മതത്തിലെ ദൈവങ്ങളോടുള്ള അനാദരവാണ് ടീസറെന്നും ഇത് അംഗീകരിക്കാന്‍ സാധിക്കില്ലെന്നും ബ്രജേഷ് പതക്ക് പറഞ്ഞു. സന്യാസിമാര്‍ എന്തു പറഞ്ഞാലും ശ്രദ്ധിക്കേണ്ടതുണ്ട്. സിനിമകള്‍ പലപ്പോഴും ഹിന്ദുക്കളുടെ വികാരത്തെ വ്രണപ്പെടുത്തിയിട്ടുണ്ട്. നമ്മുടെ സംസ്‌കാരം ആക്രമിക്കപ്പെട്ടപ്പോഴെല്ലാം നമ്മുടെ സംസ്‌കാരത്തെ സംരക്ഷിച്ചത് ഇവിടുത്തെ സന്യാസിമാരാണ്. നമ്മുടെ സംസ്‌കാരത്തില്‍ അഭിമാനിക്കുന്നതായും ബ്രജേഷ് കൂട്ടിച്ചേര്‍ത്തു.  സിനിമയുടെ ടീസര്‍ കണ്ടില്ലെന്ന് പറഞ്ഞ കേശവ് മൗര്യ, സിനിമ മതവികാരം വ്രണപ്പെടുത്തിയിട്ടുണ്ടെങ്കില്‍ പ്രേക്ഷകരിലേക്ക് എത്തും മുമ്പ് അത് തിരുത്തണമെന്ന് ആവശ്യപ്പെട്ടു.  

നേരത്തെ വി.എച്ച്.പിയും ബി.ജെ.പി വക്താക്കളും ടീസറിനെതിരെ പരസ്യമായി നിലപാട് സ്വീകരിച്ചിരുന്നു. ടീസറില്‍ രാമ,രാവണ, ലക്ഷമണ കഥാപാത്രങ്ങളെ കാണിച്ചത് ഹിന്ദു മതത്തെ അവഹേളിക്കുന്ന തരത്തിലാണെന്നും അംഗീകരിക്കാന്‍ സാധിക്കില്ലെന്നും വി.എച്ച്.പി വ്യക്തമാക്കി. സിനിമ തിയറ്ററുകളില്‍ പ്രദര്‍ശിപ്പിക്കാന്‍ അനുവദിക്കില്ലെന്നും വി.എച്ച്.പി അറിയിച്ചു.

 ഒരു മിനുറ്റും നാല്‍പ്പത്തിയാറ് സെക്കന്റും നീളമുള്ള ആദിപുരുഷിന്റെ ടീസര്‍ ഇക്കഴിഞ്ഞ ഞായറാഴ്ച അയോധ്യയില്‍ വെച്ചാണ് റിലീസ് ചെയ്തത്.  റിലീസ് ചെയ്തതിന് പിന്നാലെ ചിത്രത്തിന് നേരെ വലിയ ട്രോളുകളും വിമര്‍ശനങ്ങളും ഉയര്‍ന്നിരുന്നു. ചിത്രത്തിലെ വി.എഫ്.എക്‌സിനെ ലക്ഷ്യമിട്ടാണ് ട്രോളുകളിധികവും. കാര്‍ട്ടൂണിനെ വെല്ലുന്ന ഗ്രാഫിക്‌സ് എന്നാണ് ടീസറിനെ പരിഹസിച്ച് സിനിമാ ആരാധകര്‍ പറയുന്നത്. ടീസര്‍ വീഡിയോയും കുട്ടികളുടെ കാര്‍ട്ടൂണ്‍ സംഭാഷണവും ചേര്‍ത്തുള്ള ട്രോളുകളും സമൂഹ മാധ്യമങ്ങളില്‍ പ്രചരിക്കുന്നുണ്ട്. ടീസറിനെതിരെ ട്വിറ്ററിലും വലിയ വിമര്‍ശനങ്ങളാണ് ഉയരുന്നത്.  '

തന്‍ഹാജി; ദ അണ്‍സങ് വാരിയറിന്' ശേഷം ഓം റൗട്ട് സംവിധാനം ചെയ്യുന്ന ചിത്രം ആണ് ആദിപുരുഷ്. ത്രീ ഡിയിലാണ് ചിത്രം ഒരുങ്ങുന്നത്. 500 കോടി ബജറ്റില്‍ ഒരുങ്ങുന്ന ചിത്രത്തില്‍ 250 കോടിയും വി.എഫ്.എക്‌സിന് വേണ്ടിയാണ് ചെലവഴിച്ചിരിക്കുന്നത്. 120 കോടിയാണ് ചിത്രത്തിലെ പ്രഭാസിന്റെ പ്രതിഫലം. ടീ സീരീസ്, റെട്രോഫൈലിന്റെ ബാനറില്‍ ഭൂഷണ്‍ കുമാറും കൃഷ്ണകുമാറും ഓം റൗട്ടും ചേര്‍ന്നാണ് ചിത്രം നിര്‍മിക്കുന്നത്. 2023 ജനുവരിയില്‍ തെലുഗ്, ഹിന്ദി, മലയാളം, കന്നഡ, തമിഴ് ഭാഷകളില്‍ ചിത്രം തിയറ്ററുകളിലെത്തും.  '

പ്രഭാസും സെയ്ഫ് അലി ഖാനും കൃതി സനോണും അടക്കം മികച്ച താരനിര ചിത്രത്തില്‍ അണിനിരക്കും.ഐമാക്‌സ് 3ഡി ഫോര്‍മാറ്റില്‍ കണ്ട് ആസ്വദിക്കാവുന്ന തരത്തില്‍ ടി സിരീസും റെട്രോഫൈല്‍സും സംയുക്തമായി നിര്‍മിച്ചിരിക്കുന്ന ചിത്രം ജനുവരി 12നാണ് തിയേറ്ററുകളിലെത്തുക.