കാര്‍ത്തിയുടെയും അരവിന്ദ് സ്വാമിയുടെയും ചിത്രത്തിന് പിന്നണി ഗായകനായി കമല്‍ഹാസന്‍; മെയ്യഴഗനില്‍ കമലിന്റെ രണ്ട് ഗാനങ്ങള്‍

കാര്‍ത്തിയും അരവിന്ദ് സ്വാമിയും പ്രധാന വേഷങ്ങളില്‍ എത്തുന്ന 'മെയ്യഴഗന്‍' ഏറെ പ്രതീക്ഷയോടെ കാത്തിരിക്കുന്ന തമിഴ് ചിത്രങ്ങളിലൊന്നാണ്. 96 എന്ന സൂപ്പര്‍ ഹിറ്റ് ചിത്രത്തിന്റെ സംവിധായകന്‍ സി പ്രേം കുമാര്‍ സംവിധാനം ചെയ്യുന്ന ചിത്രം സെപ്റ്റംബര്‍ 27-ന് റിലീസിന് ഒരുങ്ങുകയാണ്. ചിത്രത്തില്‍ കമല്‍ ഹാസന്‍ പിന്നണി ഗായകനാകുന്നു എന്ന പ്രത്യേകതയും മെയ്യഴഗനുണ്ട്.

ചെന്നൈയില്‍ നടന്ന ചിത്രത്തിന്റെ ഓഡിയോ ലോഞ്ചില്‍ നിര്‍മ്മാതാക്കള്‍ ചിത്രത്തിന്റെ സൗണ്ട് ട്രാക്ക് സോഷ്യല്‍ മീഡിയയിലൂടെ പുറത്തുവിട്ടിരുന്നു. മൊത്തം ആറ് ഗാനങ്ങളാണ് ചിത്രത്തിലുള്ളത്. അവയില്‍ രണ്ടെണ്ണം പാടിയിരിക്കുന്നത് കമല്‍ഹാസനാണ്. 'യാരോ ഇവന്‍ യാരോ' എന്ന തുടങ്ങുന്ന ഗാനം ഉമ ദേവി രചിച്ച് ഗോവിന്ദ് വസന്ത കമ്പോസ് ചെയ്തിരിക്കുന്നതാണ്. വിജയ് നരേനൊപ്പം 'പോരേന്‍ നാന്‍ പോരേന്‍' എന്ന ഗാനവും കമല്‍ഹാസന്‍ പാടിയിട്ടുണ്ട്.

ജ്യോതികയുടെയും സൂര്യയുടെയും നിര്‍മ്മാണ കമ്പനിയായ 2 ഡി എന്റര്‍ടൈന്‍മെന്റ്‌സാണ് ചിത്രം നിര്‍മിക്കുന്നത്. ശ്രീദിവ്യയാണ് ചിത്രത്തില്‍ നായികയായി എത്തുന്നത്. രാജ് കിരണ്‍, ദേവദര്‍ശിനി, ശ്രീരഞ്ജിനി, ജയപ്രകാശ്, ഇളവരസു, കരുണാകരന്‍, ശരണ്‍ ശക്തി, രാജ്കുമാര്‍, തുടങ്ങിയവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.