ഇന്ന് മലയാള സിനിമയില്‍ നായികയായി വരാന്‍ ആഗ്രഹിക്കുന്നവര്‍ നിരവധിയുണ്ട്; ഏറ്റവും കൂടുതല്‍ മത്സരം നിലനില്‍ക്കുന്ന മേഖലയാണ് സിനിമ; കാക്കനാട് പോയി വിളിച്ചാല്‍ ഒരു ഫ്‌ളാറ്റില്‍ നിന്ന് മൂന്ന് പുതിയ നായികമാര്‍ വരുന്നത് കാണാം; ഇവിടെ പിടിച്ച് നില്‍ക്കാന്‍ വലിയ പാടാണ്; നിഖില വിമല്‍

മലയാള സിനിമയിലെ യുവതാരങ്ങളില്‍ ഒരാളായ നിഖില വിമല്‍, സിനിമാ മേഖലയില്‍ നായികമാര്‍ക്ക് മുന്നേറാനും നിലനില്‍ക്കാനും എത്ര കഠിനമാണെന്ന് തുറന്നുപറഞ്ഞു. പുതിയ അവസരങ്ങള്‍ ലഭിക്കാനായി പലരും കൊച്ചിയിലേക്ക് കുടിയേറുന്നുവെങ്കിലും, അതിലൂടെ ഉറപ്പുള്ള ഭാവി ലഭിക്കുമെന്ന് ഉറപ്പില്ലെന്നതാണ് നിഖിലയുടെ അഭിപ്രായം.

'ഇന്ന് മലയാള സിനിമയില്‍ നായികമാരായി വരാന്‍ ആഗ്രഹിക്കുന്നവര്‍ അനവധി പേരുണ്ട്. കാക്കനാട് പോയി വിളിച്ചാലും ഒരൊറ്റ ഫ്ളാറ്റില്‍ നിന്നെങ്കിലും മൂന്ന് പുതുമുഖ നായികമാരെ കാണാം. അത്രയും മത്സരം നിലനില്‍ക്കുന്ന മേഖലയാണ് ഇത്,' എന്ന് നിഖില ഒരു ഓണ്‍ലൈന്‍ മാധ്യമത്തിന് നല്‍കിയ അഭിമുഖത്തില്‍ പറഞ്ഞത്. 

സിനിമയില്‍ തുടര്‍ച്ചയായി അവസരങ്ങള്‍ ലഭിക്കാതെ പലരും പിന്നിലേക്ക് പോകേണ്ടി വരുന്നതായും അവര്‍ പറഞ്ഞു. ''ഒരു പുതുമുഖ നടിക്ക് രണ്ടോ മൂന്നോ സിനിമകള്‍ കിട്ടും. മൂന്നാമത്തെ സിനിമയില്‍ അവള്‍ പ്രതിഫലം കൂട്ടി ചോദിച്ചാല്‍ അടുത്ത അവസരം നഷ്ടമാകും. കാരണം നിര്‍മാതാക്കള്‍ പുതിയ മുഖങ്ങളെ തന്നെ തിരയും,'' എന്ന് നിഖില വ്യക്തമാക്കി.

കൊച്ചിയിലേക്ക് താമസം മാറ്റുന്നത് എല്ലാ താരങ്ങള്‍ക്കും ആവശ്യമല്ലെന്ന നിലപാടും അവര്‍ വ്യക്തമാക്കി. ''ആദ്യകാലത്ത് തന്നെ ഇവിടെ താമസം മാറേണ്ടതില്ല. രണ്ട് മൂന്നു സിനിമകള്‍ കഴിഞ്ഞു ഉറച്ച സ്ഥാനം കിട്ടുമ്പോഴായിരിക്കും അത് വേണ്ടത്. അല്ലെങ്കില്‍ വാടകയും ബില്ലുകളും അടച്ച് ബുദ്ധിമുട്ടിയാകും നില്‍ക്കേണ്ടത്,'' എന്ന് നിഖില പറഞ്ഞു.

നാടിനോടുള്ള ബന്ധം ഇപ്പോഴും ശക്തമാണെന്നും അവര്‍ കൂട്ടിച്ചേര്‍ത്തു. ''ഞാന്‍ ഇപ്പോള്‍ മാത്രമാണ് കൊച്ചിയിലേക്ക് മാറിയത്. അവസരം കിട്ടിയാല്‍ വീട്ടിലേക്ക് പോകും. നാടിനോടുള്ള ബന്ധം എപ്പോഴും ഉണ്ടാകും,'' എന്നും താരം പറഞ്ഞു.

നിഖില വിമലിന്റെ പുതിയ ചിത്രം 'പെണ്ണ് കേസ്' ഉടന്‍ റിലീസ് ചെയ്യാനിരിക്കുകയാണ്. വിവാഹ തട്ടിപ്പുകാരിയായിട്ടാണ് അവര്‍ ചിത്രത്തില്‍ അഭിനയിക്കുന്നത്. വ്യത്യസ്ത കഥാപാത്രങ്ങളെ തെരഞ്ഞെടുക്കുന്നതിലൂടെ പ്രേക്ഷകര്‍ക്കിടയില്‍ ഏറെ ശ്രദ്ധ നേടിയ നിഖിലയുടെ പുതിയ ചിത്രം ഏറെ പ്രതീക്ഷയോടെയാണ് ആരാധകര്‍ കാത്തിരിക്കുന്നത്.