പത്തു വര്‍ഷത്തിനുശേഷം മമ്മൂട്ടി ജോഷി കൂട്ട്‌കെട്ട് വീണ്ടും; അടുത്ത വര്‍ഷം ചിത്രീകരണം ആരംഭിക്കുന്ന ചിത്രത്തിന് തിരക്കഥ ഒരുക്കുന്നത് സജീവ് പാഴൂര്‍

മലയാളത്തിലെ എക്കാലത്തെയും മികച്ച സൂപ്പര്‍ഹിറ്റ് കൂട്ടുകെട്ടുകളില്‍ ഒന്നാണ് മമ്മൂട്ടി-ജോഷി ടീമിന്റേത്. പത്ത് വര്‍ഷത്തിനുശേഷം ഈ കൂട്ടുകെട്ട് വീണ്ടും ഒന്നിക്കുകയാണെന്ന് റിപ്പോര്‍ട്ട്. അടുത്ത വര്‍ഷം ചിത്രീകരണം ആരംഭിക്കാനിരിക്കുന്ന ചിത്രത്തിന് തിരക്കഥ ഒരുക്കുന്നത് ദിലീഷ് പോത്തന്റെ തൊണ്ടിമുതലും ദൃക്സാക്ഷിയും രചിച്ച സജീവ് പാഴൂരാണ്. കൂടുതല്‍ വിവരങ്ങള്‍ ലഭ്യമായിട്ടില്ല.

2008ല്‍ പുറത്തിറങ്ങിയ മള്‍ട്ടിസ്റ്റാര്‍ ചിത്രമായ ട്വന്റി ട്വന്റിയാണ് ഇരുവരും അവസാനമായി ഒന്നിച്ച ചിത്രം. 2007ല്‍ രഞ്ജിത്തിന്റെ രചനയില്‍ ഒരുക്കിയ നസ്രാണിയാണ് മമ്മൂട്ടിയെ മാത്രം നായകനാക്കി ജോഷി ചെയ്ത ചിത്രം.

മൂന്ന് വര്‍ഷത്തിനുശേഷമാണ് ജോഷി ഒരു ചിത്രവുമായി എത്തുന്നത്. 2015ല്‍ പുറത്തിറങ്ങിയ മോഹന്‍ലാല്‍ ചിത്രം ലൈല ഒ ലൈലയാണ് ജോഷി അവസാനമായി സംവിധാനം ചെയ്ത ചിത്രം. റണ്‍ ബേബി റണ്ണിനുശേഷം മോഹന്‍ലാലും അമല പോളും ഒന്നിച്ച ചിത്രം പക്ഷേ, ബോക്സ് ഓഫീസില്‍ വലിയ ചലനം സൃഷ്ടിച്ചിരുന്നില്ല. സന്ദര്‍ഭം, ഒന്നിങ്ങു വന്നെങ്കില്‍, ശ്യാമ, ന്യൂഡല്‍ഹി, ദിനരാത്രങ്ങള്‍, സംഘം, നായര്‍ സാബ്, മഹായാനം, കുട്ടേട്ടന്‍, കൗരവര്‍, സൈന്യം എന്നിവയായിരുന്നു ജോഷി മമ്മൂട്ടി കൂട്ടുകെട്ടില്‍ പിറന്ന ചില ഹിറ്റ് ചിത്രങ്ങള്‍.