പ്രഭുദേവ കാണിച്ച് നല്കുന്ന സ്റ്റെപ്പുകള്‍ക്ക് ചുവട് വച്ച് മഞ്ജു; നടിയുടെ അടിപൊളി നൃത്തച്ചുവടുകളുമായി ആയിഷ ചിത്രത്തിലെ ഗാനത്തിന്റെ ലിറിക്ക് വീഡിയോ പുറത്ത്

മഞ്ജു വാര്യര്‍ കേന്ദ്ര കഥാപാത്രത്തെ അവതരിപ്പിക്കുന്ന 'ആയിഷ' എന്ന ചിത്രത്തിലെ ഗാനം എത്തി. 'കണ്ണില് കണ്ണില്' എന്നാരംഭിക്കുന്ന ഗാനമാണ് പുറത്തിറങ്ങിയത്. ചിത്രത്തിന്റെ നൃത്ത സംവിധായകനായ പ്രഭുദേവ മഞ്ജു വാര്യര്‍ക്ക് നൃത്തച്ചുവടുകള്‍ പറഞ്ഞു കൊടുക്കുന്ന ദൃശ്യങ്ങളും വീഡിയോയിലുണ്ട്. നൃത്തത്തിന് ഏറെ പ്രാധാന്യമുള്ള സിനിമയുടെ കോറിയോഗ്രാഫി നിര്‍വഹിച്ചിരിക്കുന്നത് പ്രശസ്ത നടനും സംവിധായകനും നര്‍ത്തകനുമായ പ്രഭുദേവയാണ്....

വീഡിയോയില്‍ മഞ്ജുവിന്റെ നൃത്തം, പ്രഭുദേവയുടെ കോറിയോഗ്രാഫിക്കിടയിലെ രസകരമായ നിമിഷങ്ങളെല്ലാം കാണാനാകും. വ്യത്യസ്തമായ ലുക്കിലാണ് മഞ്ജു ഈ ഗാനരംഗത്തില്‍ പ്രത്യക്ഷപ്പെടുന്നത്. അറബിക്ക് എസന്‍സുളള ഗാനം വളരെ ആകര്‍ഷകമായിരിക്കുന്ന എന്നാണ് ആരാധകരുടെ അഭിപ്രായം. എന്തായാലും പ്രഭുദേവയുടെ ശിഷ്യണത്തിലുളള മഞ്ജുവിന്റെ നൃത്തം കാണാനായി മുഴുവന്‍ വീഡിയോയ്ക്കായുളള കാത്തിരിപ്പിലാണ് ആസ്വാദകര്‍. ബി കെ ഹരിനാരായണന്റെ വരികള്‍ക്കു സംഗീതം ഒരുക്കിയിരിക്കുന്നതു എം ജയചന്ദ്രനാണ്. അഹി അജയനാണ് ഗാനം ആലപിച്ചിരിക്കുന്നത്.

നവാഗതനായ ആമിര്‍ പള്ളിക്കല്‍ സംവിധാനം ചെയ്യുന്ന ആയിഷയുടെ രചന ആഷിഫ് കക്കോടിയാണ്.ക്രോസ് ബോര്‍ഡര്‍ ക്യാമറയുടെ ബാനറില്‍ സക്കറിയയാണ് ചിത്രം നിര്‍മ്മിക്കുന്നത്. ഫെദര്‍ ടച്ച് മൂവി ബോക്‌സ്, ഇമാജിന്‍ സിനിമാസ്, ലാസ്റ്റ് എക്‌സിറ്റ് , മൂവീ ബക്കറ്റ് എന്നീ ബാനറുകളും ആയിഷയുടെ നിര്‍മ്മാണപങ്കാളികളാണ്. ഛായാഗ്രഹണം വിഷ്ണു ശര്‍മ, എഡിറ്റര്‍ അപ്പു എന്‍ ഭട്ടതിരി , കലാ സംവിധാനം മോഹന്‍ദാസ് , വസ്ത്രാലങ്കാരം സമീറ സനീഷ്, ചമയം റോണക്‌സ് സേവ്യര്‍, ഗാന രചന ബി കെ ഹരിനാരായണന്‍, സുഹൈല്‍ കോയ എന്നിവര്‍ നിര്‍വ്വഹിക്കുന്നു. യുഎഇയ്ക്ക് പുറമെ ഡല്‍ഹി, ബോംബെ എന്നിവിടങ്ങളാണ് ചിത്രത്തിന്റെ മറ്റു ലൊക്കേഷനുകള്‍. മലയാളത്തിന് പുറമെ ഇംഗ്ലീഷ്, അറബി, തമിഴ്, തെലുങ്ക്, ഹിന്ദി, കന്നഡ ഭാഷാപതിപ്പുകളും ചിത്രത്തിനുണ്ട്.