പ്രഭാസ് ചിത്രം പ്രൊജക്ട് കെയുടെ ആകാംക്ഷ ഉണര്‍ത്തുന്ന വീഡിയോ പുറത്തുവിട്ട് അണിയറ പ്രവര്‍ത്തകര്‍

പ്രഭാസ്- ദീപിക പദുകോണ്‍ താരജോഡികളായി എത്തുന്ന പ്രൊജക്ട് കെ യുടെ ആകാംഷയുണര്‍ത്തുന്ന വീഡിയോ പങ്കുവെച്ച് അണിയറ പ്രവര്‍ത്തകര്‍. ചിത്രത്തിന്റെ  പ്രീ - പ്രൊഡക്ഷന്‍ വര്‍ക്കിന്റെ വിഡിയോ ആണ് ഇപ്പോള്‍ സോഷ്യല്‍ മീഡിയയില്‍ തരംഗമായിരിക്കുന്നത്.പ്രോജക്ട് കെ - ഫ്രം സ്‌ക്രാച്ച് എപ്പിസോഡ് 2' എന്ന പേരിലാണ് വിഡിയോ ഇറക്കിയിരിക്കുന്നത്.

ഇന്ത്യ ഒട്ടാകെ കാത്തിരിക്കുന്ന പ്രഭാസ് നായകനാകുന്ന പ്രോജക്ട് കെ ഏറ്റവും ചെലവേറിയ ഇന്ത്യന്‍ സിനിമയായിട്ടാണ് എത്തുന്നത്. വൈജയന്തി മൂവീസ് നിര്‍മിക്കുന്ന അമ്പതാമത്തെ ചിത്രം നാഗ് അശ്വിന്റെ സംവിധാനത്തിലാണ് ഒരുങ്ങുന്നത്.  നിലവില്‍  പ്രൊഡക്ഷന്‍ ഘട്ടത്തിലാണ് സിനിമ . ചിത്രത്തിനായി പ്രത്യേക പ്രൊമോഷന്‍ ക്യാമ്പയിനാണ്  നടക്കുന്നത്. 

ആദ്യ എപ്പിസോഡ് 'റി ഇന്‍വെന്റിങ്ങ് ദി വീല്‍' എന്ന വീഡിയോ ഒരു പ്രത്യേക ഡിസൈനിലുള്ള വീല്‍ നിര്‍മിക്കുന്നതായിരുന്നു. ഈ വീഡിയോ നിമിഷനേരം കൊണ്ട് വൈറലായി മാറി. ഇപ്പോഴിതാ പ്രോജക്ട് കെ ടീം രണ്ടാമത്തെ എപ്പിസോഡ് 'അസ്സെംബ്ലിങ് ദി റെയ്‌ഡേഴ്സ്' വീഡിയോ പുറത്തുവിട്ടിരിക്കുകയാണ്. വില്ലന്റെ  യൂണിഫോം ആര്‍മിയാണ് റെയ്ഡേഴ്സ്. നിര്‍മാതാവിന്റെ വാക്കുകള്‍ പ്രകാരം സിനിമയുടെ ഏറ്റവും ചെലവേറിയ ഭാഗവും ഇത് തന്നെയാണ്.

വേള്‍ഡ് - ക്ലാസ് പ്രൊഡക്ഷന്‍ രീതിയിലാണ് ചിത്രം ഒരുങ്ങുന്നത്. സംവിധായകന്‍ നാഗ് അശ്വിന്‍ അത്രമേല്‍ സൂക്ഷമതയോടെയാണ് തിരക്കഥ സ്വീകരിക്കുന്നത്. പ്രൊഡക്ഷന്‍ ക്വാളിറ്റിയിലും ടെക്‌നിക്കല്‍ രീതിയിലും ചിത്രം ഇതുവരെ കാണാത്ത ഒരു മായാലോകം പ്രേക്ഷകര്‍ക്ക് മുന്നില്‍ ഒരുക്കുമെന്ന് തീര്‍ച്ച.

ടോളിവുഡിലെ ഏറ്റവും വലിയ പ്രൊഡക്ഷന്‍ ഹൗസായ വൈജയന്തി മൂവീസ് അമ്പതാം വര്‍ഷത്തിലേക്ക് കടക്കുമ്പോള്‍ അങ്ങേയറ്റം അഭിമാനത്തോടെയാണ് ഈ ഗോള്‍ഡന്‍ ജൂബിലി പ്രോജക്ട് പുറത്തുവിടുന്നത്. വൈജയന്തി മൂവീസിന്റെ ബാനറില്‍ അശ്വിനി ധത്താണ് ചിത്രം നിര്‍മിക്കുന്നത്.

ദീപിക പദുക്കോണ്‍ ചിത്രത്തില്‍ നായികയായി എത്തുമ്പോള്‍ ബിഗ് ബി അമിതാബ് ബച്ചന്‍ ഒരു പ്രധാന വേഷത്തിലെത്തുന്നുണ്ട്.  ജനുവരി 12, 2024 ല്‍ ചിത്രം തീയേറ്ററുകളിലെത്തും.