എംപുരാനെ സപ്പോര്‍ട്ട് ചെയ്തു കൊണ്ടുള്ള പോസ്റ്റാണെന്ന് ഒറ്റ നോട്ടത്തില്‍ തോന്നും; പക്ഷേ, അതിന് പിന്നില്‍ മറ്റ് ചില ഉദ്ദേശങ്ങള്‍;അവസരം മുതലാക്കി എന്നാണ് എനിക്ക് തോന്നിയത്; എന്ത് കിട്ടിയാലും വിറ്റ് കാശാക്കുന്ന ഒരു സ്വഭാവമാണ്; ഗോപി സുന്ദറിനെതിരെ വിമര്‍ശനവുമായി ദീപക് ദേവ്

എമ്പുരാന്‍ റിലീസിന് പിന്നാലെ സിനിമക്കും സിനിമയുടെ സംഗീതത്തിനും വിമര്‍ശനം ഉയര്‍ന്നിരുന്നത് ഏറെ ചര്‍ച്ചയായിരുന്നു.ദീപക് ദേവിന്റെ എമ്പുരാനും ഗോപി സുന്ദര്‍ ചെയ്തതുമായ പശ്ചാത്തല സംഗീതങ്ങള്‍ താരതമ്യപ്പെടുത്തി സോഷ്യല്‍മീഡിയയില്‍ ചര്‍ച്ചകള്‍ ഉയരുകയും ചെയ്തിരുന്നു. സോഷ്യല്‍മീഡിയയിലെ ഇത്തരം വിലയിരുത്തലുകള്‍ നടക്കുമ്പോള്‍ തന്നെ ദീപക് ദേവ് ഗംഭീര സംഗീതജ്ഞന്‍ ആണെന്നും അദ്ദേഹത്തെ വിമര്‍ശിക്കരുത് എന്നും ഗോപി സുന്ദര്‍ കുറിച്ചിരുന്നു. എന്നാലിപ്പോള്‍ ഇതിന് ദീപക് ദേവ് നല്കിയ മറുപടിയാണ് ചര്‍ച്ചയാകുന്നത്.

ഗോപി സുന്ദര്‍ പങ്കുവച്ച പോസ്റ്റിന് മറ്റു ചില ഉദ്ദേശ്യങ്ങള്‍ ഉണ്ടായിരുന്നുവെന്ന് പറയുകയാണ് ദീപക് ദേവ്.ആ പോസ്റ്റ് ഞാനും കണ്ടിരുന്നു. എംപുരാനെ സപ്പോര്‍ട്ട് ചെയ്തു കൊണ്ടുള്ള പോസ്റ്റാണെന്ന് ഒറ്റ നോട്ടത്തില്‍ തോന്നും. പക്ഷേ, അതിന് പിന്നില്‍ മറ്റ് ചില ഉദ്ദേശങ്ങളുണ്ടായിരുന്നു. ആ പോസ്റ്റില്‍ കൊടുത്തിരിക്കുന്ന പാട്ട് സാഗര്‍ ഏലിയാസ് ജാക്കിയിലേതാണ്. എംപുരാനെ സപ്പോര്‍ട്ട് ചെയ്യുന്നുണ്ടെങ്കില്‍ അതിലെ പാട്ടല്ലേ വെക്കേണ്ടിയിരുന്നത്. അല്ലാതെ, അയാള്‍ കമ്പോസ് ചെയ്ത ഒരു പാട്ട് വെച്ചതിലൂടെ ഗോപി എന്താണ് ഉദ്ദേശിച്ചതെന്ന് വ്യക്തമാകുന്നുണ്ടല്ലോ

ആ സമയത്ത് എംപുരാനിലെ മ്യൂസിക്കിനെക്കുറിച്ചും പല തരത്തിലുള്ള ചര്‍ച്ചകള്‍ നടക്കുകയായിരുന്നു. അതിനെക്കുറിച്ച് അറിയാമായിരുന്നിട്ടും അങ്ങനെ ചെയ്തത് അവസരം മുതലാക്കിയതായാണ് എനിക്ക് തോന്നിയത്. പലരും എന്നോട് ഈ പോസ്റ്റിനെക്കുറിച്ച് സംസാരിച്ചുകൊണ്ട് മെസ്സേജൊക്കെ ചെയ്തിരുന്നു.
 
അപ്പോഴെല്ലാം ഇത് പരാതിപ്പെടാന്‍ അവര്‍ നിര്‍ബന്ധിക്കുകയും ചെയ്തിരുന്നു. എന്നാല്‍ അതൊന്നും വേണ്ടെന്ന് ഞാന്‍ അവരോട് പറയുകയായിരുന്നു. കാരണം, അനാവശ്യമായി വിവാദങ്ങള്‍ ഉണ്ടാക്കാന്‍ ഞാന്‍ താല്പര്യപ്പെടുന്നില്ല'.- ദീപക് ദേവ് പറഞ്ഞു.