ഒടുവില്‍ അത് സംഭവിച്ചു'; എ.ആര്‍.റഹ്മാനെ കണ്ടുമുട്ടിയ സന്തോഷത്തില്‍ അമൃത സുരേഷ്

സംഗീതസംവിധായകന്‍ എ.ആര്‍.റഹ്മാനെ കണ്ടുമുട്ടിയതിന്റെ സന്തോഷം പങ്കിട്ട് ഗായിക അമൃത സുരേഷ്. റഹ്മാനൊപ്പമുള്ള ചിത്രം സമൂഹമാധ്യമങ്ങളില്‍ പോസ്റ്റ് ചെയ്തുകൊണ്ടാണ് ഗായിക സന്തോഷം അറിയിച്ചത്. 'ഒടുവില്‍ അത് സംഭവിച്ചു. എന്റെ ജീവിതത്തിലെ സുപ്രധാന നിമിഷം' എന്ന അടിക്കുറിപ്പോടെയാണ് അമൃതയുടെ സമൂഹമാധ്യമ പോസ്റ്റ്. 

അമൃത സുരേഷ് പങ്കിട്ട ചിത്രം ഇതിനകം ശ്രദ്ധേയമായിക്കഴിഞ്ഞു. ചിത്രം പകര്‍ത്തിയ നസീഫ് മുഹമ്മദിനോട് അമൃത നന്ദി അറിയിച്ചിട്ടുണ്ട്. നിരവധി പേരാണ് അമൃതയുടെ പോസ്റ്റിനോടു പ്രതികരിക്കുന്നത്. അമൃതയുടെ സഹോദരിയും ഗായികയുമായ അഭിരാമി സുരേഷ്, സംഗീതസംവിധായകന്‍ ഗൗതം വിന്‍സെന്റ് എന്നിവരും കമന്റുകളുമായി എത്തി. 

മുന്‍പൊരിക്കല്‍ ദുബായ് എക്‌സ്‌പോയില്‍ വച്ച് എ.ആര്‍.റഹ്മാനെ യാദൃച്ഛികമായി കണ്ടതിന്റെ സന്തോഷവും അമൃത ആരാധകരുമായി പങ്കുവച്ചിരുന്നു. 'ജീവിതത്തിലെ ഏറ്റവും മനോഹരമായ നിമിഷങ്ങളിലൊന്ന്' എന്നായിരുന്നു റഹ്മാനൊപ്പമുള്ള ആദ്യ കൂടിക്കാഴ്ചയെ അമൃത വിശേഷിപ്പിച്ചത്.