മൂത്തമോളുമായി പത്തുപതിനഞ്ചുവയസ്സിന്റെ വ്യത്യാസം ഉള്ളതിനാല്‍  കുഞ്ഞിന്റെ എല്ലാ കാര്യവും നോക്കുന്നത് മോളാണ് ; അവധിക്കാലത്തുകിട്ടിയ ഏറ്റവും വലിയ ഗിഫ്റ്റാണ് രണ്ടാമത്തെ മകള്‍; മലയാളം വിട്ടിട്ടില്ല; നല്ല കഥാപാത്രങ്ങള്‍ക്കായി കാത്തിരിക്കുന്നു; ഗിന്നസ് പക്രു പങ്ക് വച്ചത്

മലയാളികള്‍ക്ക് ഏറെ പ്രിയങ്കരനായ നടനാണ് ഗിന്നസ് പക്രു എന്ന അജയ് കുമാര്‍. നടന്‍ എന്നതിലുപരി സംവിധായകനും നിര്‍മ്മാതാവുമൊക്കെയാണ് അദ്ദേഹം. തന്റെ ശരീര പരിമിതികളെ നേട്ടങ്ങളാക്കി മാറ്റി ലോകം അറിയുന്ന താരമാകാന്‍ പക്രുവിന് സാധിച്ചിട്ടുണ്ട്. മലയാളത്തിന് പുറമെ അന്യഭാഷകളിലെല്ലാം തന്റെ സാന്നിധ്യമറിയിക്കാന്‍ പക്രുവിന് കഴിഞ്ഞിട്ടുണ്ട്.

പലപ്പോഴും കുടുംബവിശേഷങ്ങള്‍ സോഷ്യല്‍ മീഡിയയിലൂടെ താരം പങ്കുവയ്ക്കാറുണ്ട്. അടുത്തിടെയാണ് താന്‍ വീണ്ടും അച്ഛനായ വിവരമാണ് ഗിന്നസ് പക്രു പങ്കുവച്ചത്. ചേച്ചിയമ്മ, ബ്ലെസ്ഡ് വിത്ത് എ ബേബി ഗേള്‍ എന്നാണ് താരം കുഞ്ഞിനും മൂത്തമകള്‍ക്കുമൊപ്പമുള്ള ചിത്രം പങ്കുവച്ച് കുറിച്ചതും. ഇപ്പോള്‍ മോള്‍ വന്നതിനു ശേഷമുള്ള വിശേഷങ്ങളെക്കുറിച്ച് സംസാരിക്കുകയാണ് ഗിന്നസ് പക്രു.

ഏറ്റവും പുതിയ വിശേഷം ഒരു മോള്‍ കൂടി ജനിച്ചു എന്നതാണ്. മൂത്തമോളുമായി പത്തുപതിനഞ്ചുവയസ്സിന്റെ വ്യത്യാസം ഉണ്ട്. എന്നെക്കാളും കൂടുതല്‍ ത്രില്ലും എക്‌സൈറ്റ്‌മെന്റും മോള്‍ക്കാണ്. ഈ അവധിക്കാലത്തുകിട്ടിയ ഏറ്റവും വലിയ ഗിഫ്റ്റാണ് അത്, അതുകൊണ്ടുതന്നെ അതുമായി പുള്ളിക്കാരത്തി ഫുള്‍ ബിസിയാണ്.പല സ്ഥലങ്ങളും പോകാന്‍ വേണ്ടി നമ്മള്‍ പ്ലാന്‍ ചെയ്തിരുന്നു. എന്നാല്‍ വാവ വരുന്നത് പ്രമാണിച്ചുകൊണ്ട് വേറെ എങ്ങും പോകുന്നില്ല എന്ന് തീരുമാനിച്ചു- പക്രു പറയുന്നു.

എല്ലാ കാര്യങ്ങളും നോക്കുന്നതും കുഞ്ഞിനെ ടേക്ക് കെയര്‍ ചെയ്യുന്നതും എല്ലാം മോളാണ്. ഇപ്പോള്‍ രാത്രിയൊക്കെ ഉറങ്ങാതെ അതിനെ ഇങ്ങനെ വച്ചുകൊണ്ട് ഇരിപ്പാണ്. വളരെ സന്തോഷം ഉണ്ട്. വിഷു കൈനീട്ടം എന്നല്ല അപ്രതീക്ഷിതമായി കിട്ടിയ വലിയ ദൈവാനുഗ്രഹം ആണ് രണ്ടാമത്തെ മോള്‍- പക്രു, പറഞ്ഞു.

പ്രഭുദേവ സാറിന്റെ ഒപ്പം ബഗീര ആണ് റിലീസ് ചെയ്ത ഏറ്റവും പുതിയ ചിത്രം രണ്ടു കാലഘട്ടത്തില്‍ രണ്ടു ഗെറ്റപ്പില്‍ ഉള്ള സിനിമ ആണ്.അദ്ദേഹത്തിന്റെ സുഹൃത്തായിട്ടാണ് എത്തിയത്.ജീവയുടെ ഒപ്പം ഒരു സിനിമ വരുന്നുണ്ട്. മലയാളം വിട്ടിട്ടില്ല. നല്ല കഥാപാത്രങ്ങള്‍ക്കായി ഞാന്‍ കാത്തിരിക്കുന്നു എന്നും പക്രു പറയുന്നു.

ശാരീരികത പരിമിതികളോടെ ജനിച്ചു വീഴുന്ന ഓരോ കുട്ടികളുടെയും ജീവിതത്തില്‍ സ്വാധീനം ചെലുത്തുന്ന രണ്ടു വ്യക്തികള്‍ ആകും അച്ഛനും അമ്മയും. അവര്‍ക്ക് രണ്ടു തീരുമാനം എടുക്കാം ഇങ്ങനെ ഒരു കുഞ്ഞു ജനിച്ചു കഴിയുമ്പോള്‍ വളര്‍ത്താം പ്രോത്സാഹിപ്പിക്കാം അല്ലെങ്കില്‍ അവനെ നിരുത്സാഹപ്പെടുത്താം എന്റെ അമ്മ ആദ്യ കാറ്റഗറിയില്‍ ആയിരുന്നു.

എന്റെ കഴിവുകളെ കണ്ടെത്തി ഒരുപാട് വേദികളില്‍ കൊണ്ട് നടന്നത് അമ്മയാണ്. ഞാന്‍ എവിടെ പോയാലും ശാരീരിക പരിമിതികള്‍ ഉള്ള കുഞ്ഞുങ്ങളുടെ അമ്മമാരേ കണ്ടാല്‍ പറയും ഒരിക്കലും നിങ്ങള്‍ വിഷമിക്കരുത് എന്ന്. കാരണം നിങ്ങള്‍ക്ക് കഴിവുണ്ടെങ്കില്‍ മാത്രമേ അത്തരം കുഞ്ഞുങ്ങളെ ദൈവം നിങ്ങളെ ഏല്‍പിക്കൂ. കാരണം അത് ദൈവത്തിന്റെ കുഞ്ഞുങ്ങള്‍ ആണ് എന്ന്. അവര്‍ക്ക് വേണ്ടുന്ന പ്രോത്സാഹനം നല്‍കി മറ്റുള്ള കുട്ടികളുടെ ഒപ്പം വിടണം എന്നും പറയാറുണ്ട് എന്നും പക്രു പറയുന്നു.

കുറച്ചുസിനിമകളെ ചെയ്‌തോള്ളൂ എങ്കിലും, ആളുകള്‍ എന്നെ സ്‌നേഹിക്കുന്നുണ്ട്. എന്റെ പരിമിതികള്‍ക്കുള്ളില്‍ നിന്നുകൊണ്ട് ഒരു പിടി കഥാപാത്രങ്ങള്‍ ചെയ്യാന്‍ ആയി എന്നുള്ളത് ഭാഗ്യമായി കരുതുന്നു. പല സിനിമകളിലും ഞാന്‍ ആണ് നായകന്‍ എന്ന് അറിയുമ്പോള്‍ മുന്‍നിര നായികമാരില്‍ പലരും പിന്‍വാങ്ങിയ കാര്യം ഒക്കെയുണ്ട്. എന്റെ ഒപ്പം അഭിനയിക്കാന്‍ ആകില്ല എന്ന് പറയാതെ മറ്റുപല ഒഴിവുകഴിവുകള്‍ പറഞ്ഞുകൊണ്ട് ഒഴിവായവരും ഉണ്ട്- പക്രു പറയുന്നു.